Shillong, Jylliew 10
Ka President ka Ri, ka Droupadi Murmu, ha ka Lah Sngi U Blei ka la bhah ïa ki kam ki jam sha ki Myntri Sorkar Pdeng katkum ka jingai jingmut jong u Myntri Rangbah-duh, u Narendra Modi.
Ha kane ka jingbhah kam sha 71 ngut ki Myntri, kiba kham bun na ki tnat kiba heh la bat hi da ki Myntri kiba dei na ka seng BJP.
U Modi un peit ïa ka Ministry of Personnel, Public Grievances and Pensions; Department of Atomic Energy; Depart-ment of Space; baroh ki mat kiba ïadei bad ki kpait saiñ kam bakongsan, bad kiwei ki tnat kiba khlem ai sha kino-kino ki Myntri.
U MP ka BJP ba la rangbah, u Rajnath Singh, u la wanphai kum u Myntri ka tnat Ïada Ri katba u Modi u la bynshet biang ha u Amit Shah ïa ka tnat Korbar Ri (Home Affairs) bad ka tnat Cooperation.
Shuh shuh u Nitin Jairam Gadkari u la wanphai biang kum u Myntri ka tnat Road Transport and Highways katba u President rangbah ka BJP, u Jagat Prakash Nadda, un shimti kum u Myntri ka tnat ka koit ka khiah bad Chemicals & Fertlisers.
U Myntri Rangbah barim ka Madhya Pradesh bad uba la shah jied noh kum u MP, u Shivraj Singh Chouhan, u la shah thung kum u Myntri ka tnat ka rep ka riang bad ki nongrep, bad un bat ruh kum u Myntri ka tnat pynroi nongkyndong.
Nalorkata, ka Nirmala Sitharaman ka la wanphai kum ka Myntri ka tnat pla tyngka (Finance) bad Corporate Affairs katba u Dr Subrahmanyam Jaishankar un long biang u Myntri ka tnat bar ri.
U Myntri Rangbah barim ka Haryana, u Manohar Lal, un shimti kum u Myntri ka tnat Housing & Urban Affairs bad ka tnat bording katba u Myntri Rangbah barim ka Karnataka na ka seng Janata Dal (Secular), u HD Kumaraswamy, un long u Myntri ka tnat Heavy Industries bad ka tnat Steel.
Shuh shuh u Piyush Goyal un bat kum u Myntri ka tnat Commerce & Industry katba u Dharmendra Pradhan un bteng ban long u Myntri ka tnat pule puthi.
U Myntri Rangbah barim ka Bihar, u Jitan Ram Manjhi, uba dei ruh u nongïalam ka seng Hindustani Awam Morcha (Secular), un long u Myntri bathymmai ka tnat Micro, Small & Medium Enterprises.
U Rajiv Ranjan Singh (Lalan Singh) uba dei na ka seng Janata Dal (United) na Bihar, un long u Myntri ka tnat Panchayati Raj; Fisheries, Animal Husbandry bad Dairying.
Nalorkata, u Modi u la thung biang ïa u Myntri Rangbah barim ka Assam, u Sabananda Sonowal, kum u Myntri ka tnat Ports, Shipping bad Waterways.
Shuh shuh u Dr Virendra Kumar un long u Myntri ka tnat Social Justice & Empowerment katba u Kinjarapu Rammohan Naidu jong ka seng TDP na Andhra Pradesh un peit ïa ka tnat Civil Aviation.
U Pralhad Joshi un long u Myntri bathymmai ka tnat Consumer Affairs, Food and Public Distribution; bad New and Renewable Energy katba u MP ka BJP na Odisha, u Jual Oram, un long u Myntri ba dei peit ïa ki riewlum (Tribal Affairs).
U MP ka BJP na Bihar, u Giriraj Singh, un long u Myntri bathymmai ka tnat Textiles katba u Ashwini Vaishnaw un bteng ban long u Myntri ka tnat rel bad un peit ruh ïa ka tnat Information & Broadcasting; bad Electronics & Information Technology.
U MP ka BJP na Madhya Pradesh, u Jyotiraditya M. Scindia, un shimti kum u Myntri ka tnat Communications bad ka tnat Development of North Eastern Region (DoNER).
Nalorkata, u Modi u la pynneh ïa u MP ka BJP na Rajasthan, u Bhupender Yadav kum u Myntri ka tnat Environment, Forest and Climate Change katba u Gajendra Singh Shekhawat un long u Myntri ka tnat Culture bad Tourism.
Ha ka jaka jong ka Smriti Irani, kaba la shah rem ha ka ilekshon MP na Amethi, u Modi u la thung ïa ka Annpurna Devi kum ka Myntri bathymmai ka tnat Women and Child Development.
U MP ka BJP na Arunachal Pradesh, u Kiren Rijiju, uba la ïoh rung sha ka kynhun Myntri ha ka sien kaba lai, un long u Myntri bathymmai ka tnat Parliamentary Affairs bad ka tnat ba peit ïa ki rit paid (Minority Affairs).
Shuh shuh u Hardeep Singh Puri un bteng kum u Myntri ka tnat Petroleum and Natural Gas katba u Dr. Mansukh Mandaviya un long u Myntri bathymmai ka tnat Labour & Employment bad ka tnat ïalehkai.
U MP ka BJP na Telangana, u G Kishan Reddy un long u Myntri bathymmai ba dei peit ïa ka tnat Coal, bad Mines katba u MP na Bihar, u Chirag Paswan, uba dei u nongïalam ka seng Lok Jan Shakti Party (Ram Vilas) un peit ïa ka tnat Food Processing. U MP ka BJP na Gujarat, u CR Patil, un long u Myntri bathymmai ka tnat Jal Shakti.
Na ki san ngut ki Myntri Khynnah (Independent Charge), u Rao Inderjit Singh un long u Myntri ka tnat Statistics & Programme Implementation; u Dr Jitendra Singh un peit ïa ka tnat Science and Technology bad Earth Sciences; u Arjun Ram Meghwal ïa ka tnat Law & Justice; u Jadhav Prataprao Ganpatrao ïa ka tnat Ayush; bad u Jayant Chaudhary ïa ka tnat Skill Development & Entrepreneurship.
Nalor kitei ki 30 ngut ki Myntri kiba don ha ka kyrdan ‘Cabinet’, bad san ngut ki Myntri ha ka kyrdan Myntri Khynnah (Independent Charge), ki don ruh sa 36 ngut ki Myntri Khynnah bad ïa kine ruh la dep ban bhah kam.
