Shillong, Jylliew 10
Ka HYC-Sohïong Zone ha ka Lah Sngi U Blei ka la leit ban jurip bad peit bniah ïa ki kot ki sla jong ki bar jylla kiba trei bylla ïing ha Umsaw.
Kane ka jingleit jurip jong ka seng ka dei halor ka jingujor na ka liang ka shnong.
“Ka jingleit jong ka seng mynta ka sngi ka dei ka sien ba ar ha kaba ha ka 7 tarik mynta u bnai, na ka liang ka seng ha ryngkat bad ka shnong ka la leit ban jurip bad bad ai por ban pynbiang ïa ki kot ki sla haduh ka 10 tarik mynta u bnai. Hynrei ha kane ka sngi, na ka liang ka seng ka lap ba kine ki bar jylla kim shym la lah ban pynbiang satia ïa ki kot ki sla,” la ong ka kyrwoh na ka seng.
Katkum ka jinglap jong ki seng, kitei ki bar jylla kim shym la biang ki kot ki sla ha kaba bun na ki kim shym la don satia ïa ki ‘Labour Licence’ na ka KHADC bad na ka tnad Labour jong ka Sorkar India bad kiwei-kiwei ki kot ba donkam.
Shuh shuh kim shym la don satia ka jingpynshisha na ka tnad pulit na ki thanat jong ki, ha kawei ka liang kaba lah ban buh jingma ïa ka jaidbynriew namarba dang shen na ka liang ki pulit Assam ki la kem ïa u heh jong ka seng lehnoh ISIS na Dhubri, Assam.
“Kine ki bar jylla kiba wan trei ha Sohïong jan baroh ki dei kiba na Dhubri, Assam,” la ong ka kyrwoh na ki nongïalam ka seng.
