Shillong, Jylliew 10
U MLA ka BJP na South-Shillong, Bah Sanbor Shullai ha ka Lah Sngi Blei u la ong ba ka jingïadei hapdeng ka BJP bad ka NPP kan dang bteng ïa mynta wat la ha ka saiñ pyrthei ym lah ban ong lypa kaei ka ban jia hadien-habud.
“Ïa mynta te ngin bteng namar baroh ki ïahun lut ha ki jaka ba ki don ha ka Sorkar kynthup ma nga kum u Chairman ha kane ka Sorkar, hynrei ha ka saiñ pyrthei phim lah ban ong kaei ka ban jia. Mynta ngi don ha ka Sorkar, hadien ngi lah ban…ngim lah ban ong lypa kaei ka ban jia,” la ong u Bah Shullai haba kren sha ki lad pathai khubor ha shlem treikam ka seng.
Haba kylli, u la ong, “Kumno phin tip lypa ïa ka lashai lada ka mynta ka long kumne. Phin hap pyrkhat kumno ban im. Haba phai sha ki konstitwensi, ki MLA kin hap ban trei ha ryngkat ka jingphikir bad ka jingstad ban pynbha la ka dei kano-kano ka seng. Wat nga ruh nga hap ban pynkhie im biang baroh kiei-kiei. Shen ngan hap ban shong bad ki briew bad peit kaei bad balei ka jia kumne.”
U Bah Shullai u la ong ruh ba ka jingïoh ‘vote’ jong u ka la hiar na ka khatsaw hajar sha ka phra hajar duna.
La un dang don ne em bad ka BJP, u la ong, “Namarkata nga ong ïa phi ba ha ka saiñ pyrthei ym don u nongshun uba neh, u lok uba neh. Ngam lah ban ong, mynta nga don bad ka BJP, hadien nga lah ban don bad ka RJD…phim lah ban ong.”
Halor ka jingkyrshan ka BJP ïa ki kyrtong ka NPP ha kane ka ilekshon MP ba la dep, u la pynsngew ba um lah ban batai ïa ka jingbakla, hynrei ïa kane hap ban kylli na ki nongthep ‘vote’ jong ka Shillong bad Tura.
“Ïa kaei kaba nga lah ban ong ka long ba ha u snem 2019, ka BJP ka la pynïeng la u jong u kyrtong bad ka la ïoh pdiang ïa ka takma rnong, ka dang ïoh lad ban ïeng ha rynsan kiba jop – takma ksiar, rupa bad rnong. Kam shym la ktah ïa ka Tura ruh naba ka Agatha Sangma ka la jop don burom,” u la ong.
Ha kawei ka liang, u la ong ba ha kane ka kynti um tip ïa ka nongrim jong ka seng (BJP) ha kano ka rukom ka pynbeit bad ka NPP naba kum ki nongïalam, ki la ïoh jingbthah ha ka khyllipmat ba khatduh ban kyrshan noh ïa ka NPP bad ki la leh ïa kata.
Na ka liang u khlieh nongaiktien ka BJP, Bah Mariahom Kharkrang u la ong ba um mynjur satia ba dei namar ka jingkyrshan jong ka BJP kaba la ïalam sha ka jingshah rem noh ka NPP ha baroh ar konstitwensi.
“Kaba nyngkong, ka NPP ka la don bad ka NDA naduh ba sdang ban synshar hapoh ka Jylla. Ka ïadon bynta ruh bad ka NEDA, lada phi phai sha kane ka liang ba ka NPP ka la rem namar ka jingkyrshan ka BJP, kata ki la dei ban rem ha ka ilekshon sha ka ïingdorbar thawaiñ ha u 2023,” u la ong.
Shuh shuh u la bynrap, “Hangne, phin hap kylli ïa ki nongïalam ka NPP, ïa mynta nga imat ki la khmih bniah hangno ki bakla, hynrei ban ong beit ba dei namar ka jingkyrshan ka BJP, ngam mynjur ïa kane.”
