Shillong, Jylliew 10
Ha kawei ka jingjia ha Lad Umroi ha Ri Bhoi ha ka Lah Sngi U Blei, u kpa u la duh noh ïa la ka jingim katba u khun u la mynsaw jur hadien ba ka Scooty kaba ki la shong ka la leit rung ha khrum ka trok 14 shaka.
Katkum ka khubor ba la ïohlum na ki pulit, la ong ba katei ka trok 14 shaka ka don ïa u nombor NL01AB 9291 kaba la ñiah da u Sunil Kumar Jha.
Ïa ka Scooty kaba don ïa u nombor AS01EA 7149 la ñiah da uwei u rangbah ba la tip kyrteng kum u Tripash Sangma bad u la don lang bad u khun, u Moncembirth Marak. La ïathuh ba kane ka jingjia ka la jia ha Lad Umroi hajan ka SOS Village bad kine ki shi kpa shi khun ki dei na 12 Mer Jorabat.
La ïathuh ba kine ki shi kpa shi khun ki la thmu ban wan sha Shillong na ka bynta ban wan shim ïa ka “Migration Certificate” ïa utei u khun. Hynrei ha mar ba poi ha katei ka jaka, katei ka trok ka la phai sha ka liang ka diang bad na ka liang u nongñiah Scooty u la pyrshang ban sangeh hynrei u khlem lah satia bad namarkata ka Scooty ka la rung sha khrum ka trok bad ka shaka jong ka trok ka la ïuh ïa u Tripash Sangma bad u la khlad hashen katba u khun jong u uba shong hadien u la mynsaw bad la pynkit noh ïa u sha Umsning CHC ban ïoh ïa ka jingsumar.
Ïa ka met jong u Tripash Sangma la rah noh sha Civil Hospital ha Nongpoh ban leh ïa ka ‘post mortem’ hynrei la pyllait noh na ka ‘post mortem’ hadien ba la kyrpad da ki bahaïing hasem.
