Shillong, Jylliew 10
Ka Kong Bindas Syiem kaba dei ka longkmie kaba la shong shah thngan khlem buh por ha ka jaka pynïeng kali hajan ka Additional Secretariat naduh ka 6 tarik u Jylliew halor ka jingdawa ban maramot ïa ka surok kaba la jot rathai na Nongpoh-Umden sha Sonapur kaba hap hapoh ka Ri-Bhoi District. Hynrei ha ka 10 tarik u Jylliew kaba dei ruh ka sngi ba san jong kane ka jingïakhih shah thngan ka la kyllon kynsan ha ka jaka leit shabar na ka jingtlot kaba la ban ïa ka met ka phad jong ka bad la hap ban shuh rah sha ka jaka thiah.
Hadien katto-katno ba ka Kong Bindas ka la kyllon, na ka liang ki doktor ki la wan ban peit ïa ka koit ka khiah jong ka bad ki la ai jingmut ruh ba dei ban rah noh ïa ka Kong Bindas sha ka jaka ai jingsumar.
Ha katei ka por ba ka Kong Bindas ka la kyllon ha ka jaka leit shabar, u MLA ka Nongpoh Constituency, u Bah Mayralborn Syiem u la don lang ha katei ka jaka ban wan jngoh biang sa shisien ïa katei ka longkmie.
Na ka liang ka Kong Bindas hadien ba la tipbriew bad hapdeng ka jingtlot ka la ai jingkren sha ki paidbah kiba kyrshan ïa ka da kaba ai khublei ïa ki, bad ong ba wat la ki doktor ki la kren bad pynbor ba ka dei ban leit noh sha ka jaka ai jingsumar hynrei ka la kren da kaba shai bad ong sha ki ba ka khlem wan satia ban leit thiah ha ka jaka ai jingsumar hynrei ka la wan shong shah thngan ha katei ka jaka ban ïoh ïa ka surok ba ka la dawa.
“Ki doktor ki lah wan ban pynbor ïa nga ban leit noh sha ka jaka ai jingsumar hynrei nga ïathuh ïaphi ba nga wan ban thiah hangne ha surok ym na ka bynta ban leit thiah ha ki jaka ai jingsumar hynrei nga wan ban dawa ïa u surok na ka bynta ka jingdonkam jong u paidbah babun balang”, la kren ka longkmie sha ki paidbah.
Katei ka longkmie ka la ong ba lada ka sorkar ka kwah ba kan mih noh na katei ka jaka, ka dei ban ai noh mardor ïa ki jingdawa jong ka na ka bynta ka bit ka biang jong ki paidbah nongshong shnong katei ka thaiñ baroh kawei.
