Nongpoh, Jylliew 10
Ki bahaïing hasem jong ar ngut ki rangbah kiba la khlad noh na ka jingtwa jong ka krem dewïong ha ki bynta jong ka khappud ka Tinsukia jong ka jylla Assam bad Arunachal Pradesh ha kine ki khyndiat taïew ba la dep, ki la ïoh ban tep noh ïa ka met kaba sah jong kitei ki rangbah ha ka shnong Umsohlait bad Shngah Tyrkhang jong ka Mawhati ha ka Lah Sngi U Blei.
Ïa ka met kaba sah jong kitei ar ngut ki ragbah kiba la tip kyrteng kum u Bah John Nongrum na ka shnong Umsohlait bad u Bah Phingel Umbah na ka shnong Shngah Tyrkhang, la ïoh ban sei noh na ka krem dewïong kaba don ha Patkai Hills ha Tinsukia ha ka Sngi Saitjaiñ.
Kum ban shu kdew biang hangne, ha ka 25 tarik Jymmang kitei ar ngut ki rangbah na Ri Bhoi lem bad uwei pat u Nepali kiba trei ha ka par dewïong ki la sahkut shapoh ka krem dewïong hadien ba la don ka jingtwa khyndew katba ki dang bylla.
Hynrei dei tad haduh mynta ka sngi ba ka ïa met kaba sah ka jong kitei ar ngut ki rangbah la lah ban pynpoi noh sha ka shnong ka jong ki, sha Shngah Tyrkhang bad Umsohlait ha kaba ki bahaïing hasem ki la ïoh ruh ban pyndep syndon ïa ka jinglehniam ba khatduh ha kitei ar tylli ki shnong ha ka jingïadon ryngkat jong u MLA ka Mawhati, u Bah Charles Marngar, ki nongïalam shnong bad ruh ki paidbah nongshong shnong ka thaiñ.
