Shillong, Jylliew 10
Ka khubor na ki pulit ba la ïohlum ha ka Lah Sngi U Blei ka ïathuh ba ka la don kawei ka jingujor ha kaba ïadei bad ka jingmih ki karkhana thang dewïong (Coke Plant) bathymmai ha ki thaiñ West Khasi Hills.
Katkum ka jingujor la ong ba ha ka 6 tarik Jylliew, ki bor ba dei khmih ki la leit ban pynlong ïa ka jingpeit bniah bad ki la lap ba ka la don ka jingpynïeng ïa ki karkhana thang dewïong bathymmai ha ki thaiñ Kyllonmathei bad Dalbot.
Kane ka jingmih jong kitei ki karkhana thang dewïong bathymmai ka long kaba pynlyngngoh namar ki bor distrik jong ka West Khasi Hills ki la dep ban pynkhyllem ïa kiba bun tylli ki karkhana thang dewïong mynshem snem hadien ka jingbthah jong ka Meghalaya High Court.
Kum ban pynkynmaw, ha ka 16 bad 17 tarik Nohprah, 2022, ki bor distrik ka West Khasi Hills ki la khang khyrdep ïa 57 tylli ki karkhana thang dewïong be-aiñ. Nalorkata, ha ka 2 tarik Rymphang, 2023, u District Magistrate ka West Khasi Hills u la ai hukum ban pynpra noh ïa kito ki karkhana thang dewïong kiba la pynïeng be-aiñ.
Hapdeng u Rymphang haduh Ïaïong 2023, ki bor distrik ki la pynpra noh ïa ki tiar ki tar kiba pynïasoh ïa ki ‘oven’ bad ki atoskhana jong 57 tylli ki karkhana thang dewïong khnang ban pynthikna ba kin ym lah shuh ban treikam.
Ym tang ba ka la don ka jingpynpra ïa ki karkhana, hynrei ki la don ruh ki briew kiba la shah kem ha kaba ïadei bad ka jingpynïaid ïa kitei ki karkhana thang dewïong be-aiñ.
Hynrei kumba ka paw na katei ka jingujor sha ki pulit, imat ki la don kiba la leit biang sha katei ka thaiñ ban pynïeng ïa ki karkhana thang dewïong.
