Shillong, Jylliew 10
U Superintendent of Police (SP) ka East Khasi Hills, u Rituraj Ravi ha u kyrwoh khubor, ba la pynmih paidbah ha ka Lah Sngi U Blei u la ong ba haduh mynta, ym pat tip ka dei ka shynrong khlieh briew ka jong no kaba la ïoh tam mynshem bnai.
U la ïathuh ba katkum ka jingïoh jingtip ha ka 22 tarik Jymmang ha ka por 5 baje 32 minit na u heh pulit ba dei peit ïa ka thanat Sadar, u K Thapa, ki pulit ki la ïoh tam ïa kawei ka shynrong khlieh briew kaba don harud surok hajan ka ïing Oriental House Building Oakland ha Bivar Road.
Hynrei ha ka sngi kaba bud pat, ki pulit ki la pyntip ba nalor ka shynrong khlieh briew la lap ruh sa ïa ki jaiñ bad ki sopti hajan ka nala kaba don ha GAD Quarter Gate, Bivar Road.
Ha kaba ïadei bad kane, na ka liang ka tnad pulit ka la leit rah ïa ka shynrong khlieh briew sha NEIGRIHMS na ka bynta ban pynlong ïa ka jingpeit bniah ha kaba ka kaiphod ha ka 31 tarik Jymmang ka ïathuh ba kane ka shynrong khlieh briew ka lah ban dei ka jong u shynrang briew uba hapdeng ka rta 30 haduh 40 snem, ka jingjrong ba 145 haduh 160 cm bad une u briew u la khlad la kumba 2 haduh 6 taïew.
Ki jaiñ ba la ïoh tam ki kynthup ïa kawei ka ‘coat’ ba ïong, kawei ka sopti ba ïong ba khleh rong bthuh bad lieh bad kawei pat ka sopti rong suiñ bneng, kawei ka ïitkhmih, snad, bad i jingbuh duma.
La ong ba ïa kane ka shynrong khlieh briew la buh ha NEIGRIHMS ïoh don ki bahaïing kiba wan kam bad na ka liang ka tnad pulit ka la pynrung mukotduma ha kaba ïadei bad kane ka jingjia ha thanat Sadar.
La kyntu ruh ïa kito kiba la don ki bahaïing hasem kiba la jah ha kine ki khyndiat por ba kin wan shakhmat ban ïakynduh ïa ki pulit ïoh ba katei ka shynrong khlieh briew ka dei jong ki bahaïing hasem jong ki.
