Shillong, Jylliew:
U kyrtong shimet ka 1-Shillong Parliamentary konstitwensi ha ka ilekshon MP ba la dep, u Prof. Lakon Kma u la ong ba wat la u la shah rem noh ha kane ka ilekshon hynrei un dang ïai bteng ban ïadon bynta ha ki kam saiñ pyrthei. “Ngi pdiang ïa ka risol namar ka dei ka rai jong u paidbah. Ngi ai khublei bad kitbok kitrwiang ïa u Dr. Ricky A.J. Syngkon jong ka Voice of the People Party (VPP) uba la poi sha ka thong bad ngi kyrmen ba un rah ïa ki mat ba donkam ha ïingdorbar Parliament,” la ong Prof. Kma ha ka Sngi Balang.
Haba kdew ïa ka jingithuh-jingithaw bad u Dr. Syngkon, u la pynpaw ka jingkyrmen skhem ba u Dr. Syngkon un sa pynsngew ïa ki mat bapher-bapher haba ïadei bad ka Jylla khamtam halor ka skulbah NEHU.
“Ngi khmih lynti ba un rah ïa ki mat ba ïadei bad ka NEHU khamtam halor u VC uba ngi don. Ka shong ha u kumno u pynsngew ïa kane ka mat ha ïingdorbar Parliament,” la ong u Prof. Kma.
Haba kylli, u la ong ba kawei na ki jingeh kaba u mad ha kane ka ilekshon kaba la dep ka dei halor ka jingbym don jong u ha kano-kano ka seng saiñ pyrthei.
“Lada don ha ka seng, kata ka la don hi ka jingïakhun. Kum u kyrtong shimet pat ka eh shi kat dei, watla katta ruh, ngi don ka jingkyrmen,” u la ong.
Ha kajuh ka por, um shym la kyntait bad ong ba ka lyer jong ka VPP ka la beh bha ha kane ka ilekshon.
Haba kren halor ka saiñ pyrthei ha ka kyrdan jong ka ri (National), u Prof. Kma u la ong ba kawei na ki bynta kaba hakhmat eh haba ïadei bad kane ka liang ka long ban don ne ïoh ïa u kyrtong bad ka seng kaba biang.
Halor ki seng saiñ pyrthei ka Jylla, u la ong, “Phi la ïohi hi ïa ka ‘anti-incumbency’ jong u MP barim bad haba phai sha ka NPP, baroh ka dei ka jingbitar jong u paidbah halor ki jingkynnoh bamsap, ka UDP kumjuh.”
Haba pynsngew ba un ïai minot ha kane ka bynta, utei u nonghikai ka NEHU u la ong ba un ïai bteng ban don ha ki kam saiñ pyrthei naba u la rung sha ka jylli saiñ pyrthei ym da ka jingthmu tang ban ïakhun ïa ka ilekshon MP.
“Ki la don 1-2 tylli ki seng kiba la wan kynjoh ktien, hynrei nga dang pyrkhat bad ngam pat shim ïa kano-kano ka rai,” u la ong.
Ha kane ka bynta, u la ong ba lada un rung sha kano-kano ka seng, un hap ban peit ïa kata kaba ïahap bad ki nongrim jong u bad ka bym don kano-kano ka jingïadei bad ka niam, hynrei kaba burom ïa ka Riti Synshar ka Ri. Shuh shuh u la bynrap, “Ngam kyrkieh haba ïadei bad kane. Hooid, marwei ka eh ban trei hynrei lada kwah jingkylla donkam ïa ka kynhun.”
U Prof. Kma uba la ïoh palat 18 hajar ‘vote’ ha kane ka kynti u la ai khublei ruh ïa baroh ki paidbah kiba la ai ka jingkyrshan ïa u ha kane ka ilekshon ba la dep sha ka Lok Sabha.
