Shillong, Jylliew 10
U MLA ka Gambegre konstitwensi u Saleng A Sangma u la iehnoh (resign) kum dkhot ka Ïingdorbar Thawaiñ ka Jylla hadien ba u la shahjied kum u MP bathymmai ka Tura Lok Sabha konstitwensi.
U Saleng u la leit dalade sha Assembly Secretariat ban aiti ïa ka shithi iehnoh kam kum u MLA ka Gambegre, ha kaba la shim ïa ka shithi da u Commissioner and Secretary ka Assembly u Bah Andrew Simons namarba u Lamphang ka Ïingdorbar Thawaiñ um don.
Ha kane ka sngi la synran lang ïa u Saleng da ka Working President ka Meghalaya Pradesh Congress Committee (MPCC) ka Deborah Marak nalor ki nongkitkam ka Mahila.
U la ong ba un sa ïakren lang bad ki paidbah lem bad ki nongïalam ka seng na ka bynta ban sei kyrtong ha ka ilekshon shiteng samoi na Gambegre konstitwensi.
Haba kren sha ki lad pathai khubor, u Saleng u la ong ba ka jingkren ïa ka jingshisha ka la pynlong ïa ka Congress ban jop ha ka ilekshon MP ha Rilum Garo. “Ngi kren tang ki jingshisha, ngi kren halor ka jinglong-jingman ha Manipur, ki ritpaid nalor kiwei ki jingeh kum ka jingleh thurmur ka Sorkar bad ka MP barim. Ngi khlem kular hynrei ngi ong ba ngin peit ïa ki jingeh bad ki Khristan ki shah lehbor la ka dei ha Jylla ne shabar hapoh jong ka ri,” u la ong.
U la ong ba ym don TMC ne kiwei pat ki seng kiba kyrshan, hynrei dei ki paidbah kiba kyrshan kiba dei ki nongthep vote. “Ka TMC kam kyrshan ïa nga hynrei ki dei ki nongthep vote kiba kyrshan bad ka dei ruh ka bor Blei namar dei U Blei uba kyrkhu ïa nga,” la ong u Saleng.
Haba kylli la ka jingkyrshan ka BJP ïa ka NPP ka dei ruh kawei na ki daw kaba pynjop ïa u, u Saleng u la bynrap biang ba ki dei ki paidbah kiba pynjop bad um sngewdei ban ai burom ïa kano-kano ka seng, namar ki dei ki paidbah bad ki nongïalam niam kiba kyrshan.
Haba ai khublei ïa ki paidbah, u Saleng u la ong ba ki paidbah ki dei kiba tieng ïa U Blei bad ym shym la ithuh ïano-ïano ba ki dei ka BJP, ne NPP ne Congress. Ki dei kiba ieid ïa ka jingsuk bad ki la jied ïa nga ban leh ei ei ban wanrah jingkylla,” u la bynrap.
Haba kylli, u la ong ba kum ka Liang Pyrshah un don ha Parliament ban kren ïa ki mat kiba donkam na ka bynta ka jylla bad ka ri ha ryngkat ki paralok MP bad kam long phylla shuh namar u ruh u la don ha ka Liang Pyrshah kum u MLA la bun tylli ki snem bad mynta un donlang hapoh ka INDIA.
U la ong ba un rah ruh ïa ka mat ILP, ka jingpynrung ïa ka Khasi bad Garo ha ka Khyrnit baphra nalor ka CAA, nalor ka jingma jong u drok kaba donkam ban tehlakam nalor ka jingeh ha ka ïoh kam ïoh kam kaba ki samla ki mad bad donkam ban thawlad.
U la ong ba ka MP barim ka Agatha kam pat kren wat tang shisien ruh ha Parliament halor ka ILP hynrei ïa kane ka mat la kren da u Bah Vincent H Pala u MP barim lait noh tangba shu thoh shithi.
U la ong ba ka synshar paidbah mynta ka la lait im namar kim ïoh bunpaid shuh ki kynhun NDA bad kim lah ban shu lehbor.
