Shillong, Jylliew 10
Ka khubor ba la ïohlum na ki pulit ha ka Lah Sngi U Blei ka ïathuh ba ha ka 7 tarik Jylliew ha ka por kumba 6:20 janmiet, ki pulit ki la ïoh jingtip ba ki runar ki bym lah ban ithuh ki la thombor bad pynïap ïa uwei u briew ba la tip kyrteng kum u Purso Tamdulal, 40 snem ka rta.
La ong ba utei u briew u la shah pynïap katba u dang don ha lynti da ka thuk-thuk ban leit sha ka shnong Nongjri kaba hap ha thanat Umpleng ha East Jaiñtia Hills.
Ïa ka met jong utei ba la khlad la pynkit noh sha Civil Hospital, Khliehriat ban leh ïa ka ‘post-mortem’.
Ha kawei pat ka jingjia, ki pulit ki la ïathuh ba u Sushanta Palai, Engineer M/S/ KEC International Limited, u la ujor ba ha ka 6 tarik Jylliew, u la lap ba ki runar ki la tuh ïa ki mar kiba dei bad ka jingshna ïa u ‘Mobile Tower’ bad kiba shongdor kumba T. 20 lak na ka shnong Bolmoram Agargre kaba hap hapoh ka thanat Songsak ha East Garo Hills.
Shuh shuh ka khubor na ki pulit ka ïathuh ba ki runar ki la leit prong sha ka ïing sah jong kawei ka longkmie ha Lumïablot Nongthymmai, bad ki la tuh ïa kawei ka ‘Mobile Phone’, ar tylli ki sati ksiar ba shongdor kumba T. 90,000, ar tylli ki baje ba shongdor T. 30,000 eiei bad ka pisa T. 4,000.
Nalorkata, ki pulit ki la pyntip ba u Monjur Alom Mollah u la ujor ba ha ka 5 tarik Jylliew ha ka por kumba 8 baje mynstep, u la lap ba ka thuk-thuk jong u (AS-34-2462) ka la jah na Hawakhana, Tura.
