Shillong, Jylliew 10
Ka Voice of the People Party (VPP) ha ka Lah Sngi U Blei ka la leit ban buh da ka jingujor pyrshah ïa u S.P. ka East Khasi Hills, u Rituraj Ravi halor ka jingjia kaba la jia ha ka miet Sngi Saitjaiñ ha jaka shong shah thngan ka Kong Bindas Syiem hajan Additional Secretariat.
“Kaei kaba jia ha kato ka sngi ka long kaba ngi hap ban pynrem ym tang na ka liang jong ngi hynrei na ka liang jong kiba bun balang ba kam dei ban long kumto,” la ong u MLA ka VPP na Mawlai, Bah Brightstarwell Marbañiang haba kren sha ki lad pathai khubor hadien ka jingïakynduh bad u Inspector General of Police (IGP-L&O), u M.K. Singh.
Haba kdew ba ha ka jingshisha, u la khmih lynti ban ïakynduh ïa ka DGP ka Jylla, Kong Idashisha Nongrang ban ïakren halor kane ka bynta, hynrei namarba kam don shane (ka don sha Delhi), la ïakynduh noh ïa u IGP.
“Na ka liang jong nga bad ka seng hi baroh kawei ngi la ujor pyrshah ïa une u S.P. uba la ïalam ïa ki briew jong u ha kato ka sngi bad ngi la kren da kaba shai ba dei ban pynshitom ïa une u SP. Ngi la ong ba ka dei ban don ka jingtohkit da ka tnad pyrshah ïa une u SP,” la ong u Bah Marbañiang.
Na ka liang u IGP, u la ong ba wat la um don ka bor, hynrei un sa pynsngew ïa kane ka mat ynda la wan ka DGP, la ong u MLA.
“U (IGP) la ïathuh ruh ba wat na ka liang ka DGP ka la tip ïa kane bad ngi ngeit skhem ba na ka liang kiba heh, kin shim ïa ka sienjam kaba bha ban ai jingsneng ïa kum kine ki pulit ba kin ym mlien ïa kum kine ki jait kam nangne shakhmat,” u la ong.
“Ngi sngewthuh ba kin don beit ki ‘langïong hangno-hangno, hooid, ka jingkynnoh jong ngi kam dei pyrshah ïa ka tnad pulit baroh kawei naba don bun ngut ki ophisar kiba tbit bad kiba biang. Hynrei ka jingleh jong u SP ha kato ka sngi, ka long kaei-kaei kaba ngi hap ban pynrem jur,” la ong utei u nongmihkhmat.
Ha kawei ka liang, u la ong ba ka seng ka la pynsngew ruh halor ka mat haba ïadei bad ki pulit kah durkhmat bad na ka liang u IGP, u la ong ba un sa ïakren ïa kane bad ka DGP.
“Ngim lah ban sngewthuh balei namar haba ki wan ban ïadei bad ki paidbah, hynrei ka jingpynkhreh jong ki la kum ba kin leit khynra ne ïakhun lehnoh. U IGP u la ong ban shimkhia ïa kane ban ïakren bad ka DGP.
Shuh shuh u Bah Marbañiang u la pynpaw ka jingkyrmen ba nangne shakhmat, yn ym ïohi shuh ïa ka jingkah durkhmat ki pulit kaba pynrah rngiew haba ki wan ha man ki prokram ïakhih ba jai-jai, kumjuh ka jingrah ïa ki atiar kiba pynma ïa ki paidbah.
“Kane kam dei ka jinglong-jingman – lada dei ba ïakhun lehnoh man ngi sngewthuh ïa kata, hynrei haba ïadei bad u paidbah ha kane ka rukom te ka bym lah ban pdiang,” u la ong.
Katkum ki khubor kiba la mih, ha ka miet Sngi Saitjaiñ, ki pulit ka distrik ki la wan poi ha ka jaka ba shong shah thngan ka Kong Bindas Syiem da ka jingthmu ban pynkynriah jubor ïa ka na katei ka jaka ban rah (ïa ka) sha ka jaka ai jingsumar ban khmih bniah ïa ka koit ka khiah jong ka.
