Shillong, Jylliew 10
U khlieh nongaitkien ka BJP hapoh ka Jylla, Bah Mariahom Kharkrang ha ka Lah Sngi U Blei u la kren shai ba ym don kino-kino ki kynhun niam hapoh ka Jylla kiba ïalap na bynta uno-uno u kyrtong ne kano-kano ka seng saiñ pyrthei.
“Ngam tharai ba ka niam kan don jaka ne bynta hangne namar ym don kino-kino ki kynhun niam hapdeng ki Khristan la ki dei na kano-kano ka Balang kiba ïalap na bynta uno-uno u kyrtong ne kano-kano ka seng,” la ong u Bah Kharkrang haba kren sha ki lad pathai khubor.
Ha kawei ka liang, u la ong ba kawei kaba ki kynhun niam ki ju leh ka long ba ki ju pynlong ïa ka jingduwai kyrpang ha shuwa jong ka ielkshon ha kaba ki duwai ba u Blei un ai ka jingstad ïa ki nongthep ‘vote’ ban jied ïa u kyrtong bad ka seng kaba biang.
“Nga kren da kaba shai pat ba ym don kino-kino ki Balang kiba ai jingkyrshan ïa uno-uno u kyrtong ne kano-kano ka seng. Nga sngew ba kane ka long ka bym dei. Hynrei hooid, ngi ju don ïa ki jingduwai kyrpang,” la ong u khlieh nongaiktien ka seng.
Lah ban kdew ba hadien ba la dep ka jingñiew ‘vote’ na ka bynta ka ilekshon MP Lok Sabha, u Myntri Rangbah ka Assam, u Himanta Biswa Sarma, haba kren sha ki lad pathai khubor ha Assam, u la kynnoh ba ka la don kawei ka niam kaba khlem kyrshan satia ïa ka NDA ha Nagaland, Meghalaya bad Manipur.
“Ha Meghalaya, Nagaland bad Manipur, ka la don kawei ka niam kaba la ïaleh pyrshah ïa ka NDA. Bad kane ka la wanrah ïa ka jingkylla na ka daw ba kata ka niam ka don bun ngut ki nongbud ha kine ki Jylla. Kam dei satia ka jingshah rem saiñpyrthei. Ym don ba lah ban ïakhun pyrshah ïa kano-kano ka niam,” u la kynthoh.
Nalorkata, u la ong, “Ha ka jingshisha, kata ka niam kam ju tuklar ha ki kam saiñpyrthei, hynrei ha kane ka sien ki la ïadon bynta wat ha Assam ruh. Ki la trei pyrshah ïa ka NDA ha kane ka kynti.”
Lah ban kdew ba ka Congress ka la jop ha ki artylli ki konstitwensi ha Manipur, kawei ka konstitwensi ha Nagaland bad kawei ha Meghalaya. Ha Shillong Parliamentary Constituency, ka Voice of the People Party (VPP) ka la jop.
Ha Meghalaya, ka BJP ka khlem pynïeng kyrtong bad ka la kyrshan ïa ki kyrtong jong ka National People’s Party (NPP).
Ha Nagaland, ka BJP ka la kyrshan ïa u kyrtong ba la pynïeng da ka NDPP. Ha Manipur, ka BJP ka la pynïeng kyrtong na Inner Manipur konstitwensi katba ha Outer Manipur konstitwensi, ka la kyrshan ïa u kyrtong ka Naga People’s Front (NPF). Hynrei kine ki kyrtong BJP bad NDA ki la shah rem lut.
