Shillong, Jylliew 11
U Myntri Rangbah ka Jylla, u Conrad K. Sangma ha ka Sngi Ba-ar u la pynpaw ka jingsngewnguh ïa u Myntri Rangbahduh ka ri, u Narendra Modi bad ka Myntri tnad pla tyngka ka Sorkar Pdeng, ka Nirmala Sitharaman halor ka jingpyllait khajna kaba palat T. 1000 klur na ka liang ka Sorkar Pdeng sha ka Jylla.
“Nga ai khublei ïa ka Sorkar India, khamtam ïa u Myntri Rangbahduh ka ri bad ka Myntri tnad pla tyngka halor ka jingpyllait ïa ka khajna ha ka Lah Sngi U Blei,” la ong u Sangma.
Haba pynshai sha ki paidbah halor ka jingkongsan jong kane ka bynta, u la ong ba ka Sorkar ka la pyllait ar tylli ki sien siew (installment) jong ka bhah khajna kaba dei na bynta ki Jylla bapher-bapher.
“Kumta, man la u bnai ngi ju ïoh kawei ka sien siew, hynrei ka Sorkar India ha kawei ka liang ka la ai ka ‘bonus’ sha man la ka Jylla da kaba pyllait ïa 2 tylli ki sien siew,” u la ong.
U Sangma u la kren shai ruh ba ïa kane yn ym shim noh na ki sien siew ki ban wan, pynban ki dei ka ‘bonus’ bad la ai ïa ka jingmyntoi kaba arshah bad ka long ka kam kaba bha na ka liang u Myntri Rangbahduh bad ka Myntri tnad pla tyngka kumjuh ka lynti kaba biang eh ban sdang ïa ka Sorkar bathymmai.
“Sa shisien nga kwah ai khublei ïa ka Sorkar India kaba la pyllait palat T. 1000 klur ha ka liang ka bhah khajna ka ban ïarap shi kat dei ïa ka Jylla ha ki prokram pynroi bapher-bapher bad kito na bynta ka imlang-sahlang,” la ong u Myntri Rangbah.
Kum ban shu kdew hangne, la rai ba ha ryngkat ka jingpyllait ba man ka por ïa ka bynta jong ka khajna na ka bynta u bnai Jylliew 2024, yn pyllait sa ïa kawei ka bynta.
Kane ka jingpyllait pisa ka poi sha ka T. 1,39,750 klur mynta u bnai bad kane kan plie lad ïa ki Sorkar Jylla ba kin pynsted ïa ka roi ka par bad ka jingpynlut ïa ka pisa.
Ka Mang Tyngka ba shipor 2024-25 ka la pynbiang T. 12,19,783 klur na ka bynta ka jingïasam ïa ka khajna sha ki Jylla.
Lyngba kane ka jingpyllait, baroh ka pisa ba la ïasam (na ka bynta u Snem Mang Tyngka 2024-25) sha ki Jylla haduh u Jylliew 2024 ka long T. 2,79,500 klur.
Ka jingpyllait pisa sha ka Meghalaya ka long T. 1071.90.
