Shillong, Jylliew:
Ka Hynñiewtrep Integrated Territorial Organisation (HITO) sengkmie ha ka 10 tarik u Jylliew ka la leit ban aiti da ka jingthoh ha ka Director General of Police (DGP) ka jylla, ka Kong Idashisha Nongrang halor ka jingdawa ban leh da kaba tyngeh ïa u Superintendent of Police (SP) ka East Khasi Hills District, u Rituraj Ravi halor ka jingthmu leit kyndang jubor ïa ka Kong Bindas Syiem na ka jaka ba ka shong shah thngan hajan ka Additional Secretariat.
Ha katei ka shithi jingdawa, na ka liang ka seng ka la ong ba ka DGP ka jylla ka dei ban leh eiei ïa utei u SP ka East Khasi Hills District uba la leit ha ka por shiteng miet ha ryngkat ka jingsynran lem ïa u da ki katto-katne ngut ki pulit ban kyndang jubor ïa ka Kong Bindas Syiem kaba la pynlong ïa ka jingshong shah thngan halor ka jingpynslem jong ka sorkar ban pynbha ïa ka surok na Nongpoh-Umden sha Sonapur, Ri Bhoi District.
Ka seng ka la ong ba ka jingleh jong u SP ka long ka bym ïahap bad kaba la knieh jubor ïa ka hok jong ki paidbah ba kin pynlong ïa kino-kino ki jingïakhih kiba jai-jai katkum ka aiñ hapoh ka kyndon jong ka Article 19(1) (b) jong ka riti synshar ka Ri.
Ha katei ka shithi, ka seng ka la ong ruh ba katkum ka jingsakhi jong kiba bun ki paidbah kiba don ha katei ka jaka ha ka por ba u SP u wan, ki la ong ba utei u SP u la shoh khawiang. Kane ka jingleh jong utei u SP ka la pynlong ïa kiba bun ba kin dap da ki jingkylli ha kaba ïadei bad ka kam bad ka kyrdan kaba kum ki SP ki dei ban long.
Shuh shuh ka seng ka la ong ba kum kine ki jingjia ka la pynlong ïa ki paidbah ba kin duh ïa ka jingshaniah na ki bor pulit bad kaba la buh dak sniew ïa ka kyrteng bad ka burom jong ka tnad pulit baroh kawei.
Na ka liang ka seng ka la dawa na ka shlem treikam jong ka DGP ba kan shimkhia lem halor kane ka mat khnang ban pyntikna ba kum kine ki jingjia kin nym wan jia shuh ha ki por ki ban wan bad dei ban leh da kaba tyngeh ïa utei u SP ka EKHD lem bad kiwei kiba la donkti ban synran ïa u ha katei ka miet.
