Bhubaneswar, Jylliew 11
Ka seng BJP ha ka Sngi Ba-ar ka la jied da u ‘riewlum uba dei ruh u khun jong u nongap pahara ban shimti kum u Myntri Rangbah ka jylla Odisha bad yn don ruh arngut ki Symbud Myntri Rangbah.
Kan dei ka sien banyngkong ba ka BJP kan synshar marwei ha Odisha hadien ka jingjop kput ha ka ilekshon MLA kaba dang shu dep shen.
Ha ka jingïalang jong ki MLA kaba la long mynta ka sngi, u Mohan Charan Majhi, uba la long MLA la saw sien, u la shah jied ban shimti ïa ka shuki Myntri Rangbah. Ki arngut ki Symbud Myntri Rangbah ki long u KV Singh Deo bad ka Pravati Parida.
Ka jingpynbam smai ïa ka kynhun Myntri bathymmai ha Odisha kan long lashai ka sngi ha kaba u Myntri Rangbahduh, u Narendra Modi, bad u Myntri Rangbah barim ka Odisha, u Naveen Patnaik, kin ïashim bynta.
U Majhi, 52 snem ka rta, u dei u MLA na Keonjhar, bad u dei u khun jong u nongap pahara. U la jop MLA la saw sien bad la ong ba u don ka jingtbit bad jingshemphang ha ka kam shakri paidbah bad ban pynïaid ïa ki kam ki jam jong ka seng.
