Shillong, Jylliew 11
Ha kawei ka jingjia, ki pulit ha ka Sngi Ba-Ar ki la pyntip ba uwei u briew uba la leit tuh ïa kawei ka kor CCTV (Closed Circuit Television) nabar kawei ka dukan kaba don ha Khyndailad, u la shah ring dur pynban ha ka CCTV.
Ki pulit ki la ïathuh ba u Vishal Biswa, Store Manager ka Hanumanbux, Khyndailad, u la ujor ba ha ka 8 tarik Jylliew ha ka por kumba 4:39 mynstep, uwei u runar ïa u bym lah ban ithuh, u la tuh ïa kawei ka CCTV Camera kaba la buh habar jong kane ka dukan. Hynrei, u Biswa u la ong ba ha ka por ba une u runar u la tuh ïa ka kor CCTV, sa kawei pat ka kor CCTV ka la ïoh ban ring dur ïa uta u runar.
Ha kawei pat ka jingjia, u Biswajit Dutta u la ujor ba ha ka 8 tarik Jylliew ha ka por kumba 9 baje mynstep, ki runar ki la leit prong ïa ka ïing sah jong u kaba don ha thanat Sadar, Shillong, bad ki la tuh ïa ar tylli ki Mobile Phone.
Shuh shuh ki pulit ki la pyntip ba u Dennis Ryntathiang u la ujor ba ha ka 9 tarik Jylliew, ki runar ki la tuh saw tylli ki masi na ka shnong Shillingktieh kaba hap ha Sohïong, East Khasi Hills.
Nalorkata, ki pulit ki la ong ba u Manoj Singh Kharbani u la ujor ba ha ka 6 tarik Jylliew, ki runar ki la tuh ïa ka kali Bolero (ML-07A-5554) jong u na ka shnong Nongdiangkaiñ, West Khasi Hills.
Sa ha kawei pat ka jingjia, ka Rakhi D Sangma ka la ujor ba ha ka 1 tarik Ïaïong, 2024, ki runar ki la tuh ïa ka thuk-thuk (ML-05AA-6157) jong ka na phyllaw ïing kaba don ha Borsora.
Shuh shuh ki pulit ki la ïathuh ba u Soidur Rahman u la ujor ba ha ka step jong ka 6 tarik Jylliew, ka thuk-thuk jong u (AS-34-4840) ka la jah na Tura.
Ha kawei pat ka jingjia, u Kuldeep Singh u la ujor ba kham mynshwa u la pan pisa kylliang kaba la kot sha ka T. 3.5 lak na uwei u briew ba la tip kyrteng kum u Dinddayal Sharma. Ha ka 6 tarik Jylliew pat, u Singh u la ong ba u Dinddayal Sharma u la leit sha ka ïing sah jong u kaba don ha Warimagre, Williamnagar, bad u la dawa ba u dei ban siew noh ïa katei ka pisa. Ha kajuh ka por, u Singh u la ong ba u Sharma u la shoh la dat ïa u bad u la rah jubor ïa ka pisa T. 8 lak.
Nalorkata, ki pulit ki la ïathuh ba u Raiseng Ch Marak na ka shnong Buripara, West Garo Hills bad ar ngut kiwei pat ki la ujor ba ha ka 8 tarik Jylliew, ki la ïoh jingtip na ki nongshong shnong ba ki dang ïa beh thong ïa ki briew kiba la wan tuh masi. La ong ba kine ki lai ngut kiba ujor ki la ïoh bat ïa kawei ka kali Bolero Pick-Up kaba don ïa u nombor ML-08J-5433, bad ki la don lai ngut ki briew hapoh ka kali. Ïa kane ka kali la ïoh bat ha kawei ka jaka kaba don hajan ka shnong Sropgre, West Garo Hills. Hynrei na kine ki lai ngut, ar ngut ki la ïoh lad ban phet krad katba ïa uwei pat, la aiti noh sha ki pulit ka Babadam.
