Mawkyrwat, Jylliew 11
Ka KSU South West Khasi Hills District ryngkat ka KSU Mawkyrwat Circle da ka jingsngewkhia ka la sei madan da ka RTI halor ka jyrsieh thungkam thungjam jong ka tnad ka koit ka khiah ha Civil Hospital, Mawkyrwat, ki CHC, PHC , Sub- Centre kumjuh ha ka National Health Mission.
U samla Forwardman Nongrem, President ka KSU South West Khasi Hills District, haba ai jingkren sha ki lad pathai khubor u la ïathuh ba katkum ka jingïoh jingtip lyngba ka RTI na ka ophis DHS Shillong bad ka ophis u DMHO Mawkyrwat, ki don haduh 51 tylli ki kam ‘Officiate’, 54 tylli ki kam ‘Casual’ bad 7 tylli ki kam ‘Non-Sanction’ ha ki jaka sumar bapher-bapher jong ka South West Khasi Hills District hynrei kaba sngewsih ka long ba ïa kine ki kam, ka tnat ka koit ka khiah ka la shu thung sop-sop bad ka khlem da pynbna paidbah ne khot ‘interview’ kaba la ktah haduh katta-katta ïa ka hok ki samla wadkam wadjam napoh ka distrik.
U samla Forwardman u la ong ba na ka liang ka seng ka pynrem jur ïa kane ka jingleh jong ka Sorkar bad tnad ka koit ka khiah.
“Kane ka long kaei kaei kaba ka seng kam lah ban pdiang. Ha jingshisha, ki la dei ban pynbna paidbah khnang ban wanrah ïa ka jinghun jong ki samla wad kam wad jam jong ka distrik hi baroh kawei,” u la ong.
Na ka liang ka seng ka la byrngem ruh ba shen kan sa leit ban ujor sha ki bor ban pynbeit ïa kine kiei-kiei bad ha kaba ïadei bad ki 112 tylli ki kam, ka seng ka la dawa ba dei ban pynshai paidbah.
Ka seng ka kyntu ruh ïa ki khun samla wad kam wad jam ba ki dei ban mih shakhmat bad ka seng ruh kan don ryngkat-ryngkat khnang ban weng ïa kine ki kam bamsap bampong ym tang ha ka tnad ka koit ka khiah hynrei ha kiwei ruh, la ong u samla Forwardman Nongrem.
