Shillong, Jylliew:
Ka Khun Hynñiewtrep National Awakening Movement (KHNAM) ha ka 10 tarik u Jylliew ka la leit ban aiti da ka jingthoh sha ka Director General of Police(DGP) ka jylla, ka Kong Idashisha Nongrang bad ka la leit ruh ban ïakynduh ïa u Additional Chief Secretary ka jylla, u Shakil P. Ahmed ban dawa ba dei ban pynkynriah kam noh mardor ïa u Superintendent of Police (SP) ka East Khasi Hills District, u Rituraj Ravi halor ka jingthmu ban leit kyndang bad pynkynriah jubor ïa ka Kong Bindas Syiem na ka jaka ba ka shong shah thngan sha ka jaka ai jingsumar.
Kum ban shu kdew hangne, ka Kong Bindas Syiem ka la shong shah thngan ha ka jaka pynïeng kali kaba don hajan ka Additional Secretariat naduh ka 6 tarik u Jylliew halor ka jingdawa ban pynbha bad maramot ïa ka surok na Nongpoh-Umden sha Sonapur, Ri-Bhoi District. Hynrei ha ka miet jong ka 8 tarik u Jylliew, utei u heh pulit ha ryngkat bad ka kynhun pulit ki la leit sha katei ka jaka ban kyndang bad ai daw ba ki hap ban ïalam ïa ka Kong Bindas sha ka jaka sumar ban leh ïa ka Medical Check-up.
Kane ka jingleh jong utei u heh pulit ha ka por shiteng miet ka la pynlong ïa kiba bun balang ban dap da ka jingbitar namar ka dei ka longkmie bad ka la mih ruh ka jingkynnoh ba utei u heh pulit u lah wan sha katei ka jaka da ka jingshoh khawiang.
Haba kren sha ki lad pathai khubor halor kane, na ka liang u Working President ka KHNAM, u Bah Thomas Passah, u la ong ba ka seng ka pynrem jur ïa katei ka jingleh jong utei u SP namar ka long kaei-kaei ka bym itynnad satia bad kum ka seng ka dawa beit-beit da kawei ka sur ba dei ban pynkynriah kam noh shisyndon ïa utei u heh pulit.
U Bah Thomas u la ong ba ha ka jingïakren bad u Additional Chief Secretary ka jylla, ka seng ka la ong ba ha ka jingshisha ka tnad pulit ka donkam ïa ka jingkyrshan bad ka jingshaniah na ki paidbah khnang ba kin dang lah ban trei kham bha ha ka kam jong ki. Hynrei ka jingjia kaba la jia ha katei ka miet, ka la pynpaw ba ka tnad pulit kam treikam bha bad ka wanrah ruh ïa ka jingduh jingshaniah na ki paidbah ha ka tnad pulit.
“Lada ki bor jong ka aiñ ki ïaid da kane ka lynti ha ka jingbuaid kin ïaid sharum shaneng bad wanrah ïa ka jingpynkheiñ aiñ, lehse kiba bun ki khynnah samla jong ngi kin ngat ha ka jingkput kaba ym dei shuh kano-kano ka kam kaba dei ban leh da ka tnad pulit hynrei kan dei ka jingkput ha ka jingsngew jong ki”, la ong u Bah Thomas.
U la ong ba na ka liang ka seng ka la ai jingmut ba khnang ba ki paidbah kin don ïa ka jingshaniah ha ka tnad pulit bad ba kiei-kiei ki kam kin ïaid beit-ïaid ryntih, ka seng da kawei ka sur, ka la dawa ba ka sorkar ka dei ban pynkynriah noh ïa utei u SP khnang ba ki paidbah kin don ka jingshaniah ïa ka sorkar namar lada kam leh kumta, ka pynpaw shai ba ka sorkar ka ai jingkyrshan ïa kum kine ki jingleh jong kito ki briew kiba don ha ka bor.
“Lada ka sorkar kam pynkynriah ïa une u SP wat hadien kato ka jingjia ha ka 8 tarik, kan paw ba ka sorkar ka ai jingkyrshan ïa kum kine ki jingleh”, la bynrap u Bah Thomas.
Na ka liang u Additional Chief Secretary u la ong ba un sa shim ïa ka kaiphod na ka DGP ka jylla bad kin sa leh ïa kaba donkam bad na ka liang ka seng ka khmih lynti ba ka sorkar kan leh eiei halor kane ka bynta.
Shuh shuh u Bah Thomas u la ong ba kane ka jingpyndonkam bakla jong ki bor pulit ïa ka aiñ kam dei shuh ha ka sien kaba nyngkong hynrei ha ki por kiba lah dep ruh, la ïohi ba ka tnad pulit ka la pyndonkam bakla ïa ka bor jong ki da kaba ai nuksa ïa ka jingjia shah siat ïap jong u Bah Cherishtarfield Thangkhiew ha Mawlai, ka jingshah kawang lyer pynsat khmat ki dukan jong ki ‘riew paidbah hajan ka DC ophis nalor kiwei-kiwei pat ki jingjia.
