Shillong, Jylliew 11
U General Secretary ka United Democratic Party (UDP), Dr. Jemino Mawthoh u la ong ba kawei na ki daw jong ka risol sha ka ilekshon Lok Sabha ba dang shu dep (ha Meghalaya) ka dei namar ka jingjur palat jong ka lyer pyrshah Sorkar lyngba kiba bun ki jingjia hapoh ka Jylla.
“Bunsien hi, ki ilekshon la ka long ha kyrdan jong ka ri ne ha ki Jylla, ki long ki bym lah ban tip lypa kaei ka ban jia. Haba phai sha ka risol jong ka ilekshon ba dang shu dep hapoh ka ri, kam shym la urlong kumba la khmih lynti. Ha ka jinglong-jingman ka saiñ pyrthei hapoh ka ri, ngi ïohi ba ki nongthep ‘vote’ ki don la ka jong ka rukom pyrkhat,” la ong u Dr. Mawthoh ha ka Sngi Ba-ar.
Haba kdew ba kane ka rukom pyrkhat ki nongthep ‘vote’ ka ïasyriem hapoh ka Jylla, u la ong ba ym shym la don ba khmih lynti ba ka risol kan long ha kato ka rukom.
“Kawei na ki daw nga ïohi – ka lyer pyrshah Sorkar ka jur bha bad kumba kren, ki la don bun tylli ki jingjia hapoh ka Jylla, ha kawei ka liang kaba pynlong ïa u paidbah ban ïalam sha ka jingpyrkhat ban pyrshah Sorkar. U paidbah haba u ïohi ïa kane, u phai khmat noh shawei bad hangne u paidbah u sngew ba ka VPP ka long kata ka lad ka lynti bad u noh sha ka,” u la ong.
Haba kren shaphang ka risol jong ka ilekshon ba dang shu dep, u General Secretary u la pynkynmaw ba ha ka ilekshon ha u snem ba la dep sha ka ïingdorbar thawaiñ ka Jylla, ka jingïoh ‘vote’ jong ka UDP ka la jan kot 3 lak, hynrei kane ka la hiar syndet ha kane ka kynti.
“Palat 2.50 lak tylli ki ‘vote’ ki jah. Na ka liang ka seng kan wad ïa ki daw kaei kaba la pynlong ïa ka ‘vote’ ban hiar. Hooid, ki don bun ki daw, hynrei ka ilekshon ka dei ka ilekshon, mynta ka long kumne, lashai ka lah ban long da kumwei pat,” la ong utei u nongïalam.
Haba kdew ba ka UDP bad ka HSPDP (kiba don lang ha ka RDA) ki long ki seng kiba la rim hapoh ka Jylla, u la ong na ka liang jong kine ki ar seng kin bteng ïa ka jingtreikam bad kin sa khmih bniah ban sngewthuh halor ka jinglong-jingman bad ka jinghiar ha kane ka ilekshon ba dang shu dep.
“Kam mut pat ba ngi hiar ha ka MP, ngin hiar lang ha ka MDC ne MLA. Na ka liang jong ngi, ngi pdiang ïa ka risol, hynrei kane kan ym pynduh mynsiem pat ïa ngi bad ngin ïai shakri kumjuh ïa u paidbah kumba ju leh,” la ong une u nongïalam.
U la ban biang ba ka nongrim jong ka seng kumba ka long – ban pynïatylli ïa ka jaidbynriew bad ki seng ‘riewlum, ka long ka thong ka UDP, bad kane kan ïai bteng.
“Kum ki seng kiba la rim hapoh ka Jylla (UDP & HSPDP), ngin peit hangno ngi bakla bad ngin pynbeit ïa ki,” u la ong.
Ha kawei ka liang, haba phai pat sha ar ngut ki MP – Dr. Ricky A.J. Syngkon (VPP) na Shillong Parliamentary konstitwensi bad u Saleng Sangma (INC) na Tura Parliamentary konstitwensi, u Dr. Mawthoh u la ong ba kumba ki paidbah ki la ai ka rai da kaba pynjop donburom ïa ki, kumta la khmih lynti ba kin long ka sur ban rah ïa ki mat ki jura hapoh ïingdorbar Parliament kum ka ILP, Khyrnit ba 8, kam ïa-ka-jia pud, jingkyrduh kam, UCC, CAA, nalor kiwei-kiwei.
“Ngi kitbok kitrwiang ïa ki ba kin leh bha,” la ong utei u nongïalam ka UDP.
