Nongpoh, Jylliew 11
Ki bor pulit ka Ri Bhoi District lyngba ka kynhun Special Team bad kiwei ha ka jingleit khynra kaba la pynlong ha ka Lah Sngi U Blei, ki la ïoh kem ïa lai ngut ki briew kiba la donkti ban leit dawa pisa ha ka kyrteng jong ka seng Hynñiewtrep National Liberation Council (HNLC) sha kylleng ki jaka bad kiba treikam ha ki thaiñ Mawhati, Umroi bad ruh ha ka nongbah Shillong.
U Superintendent of Police ka Ri Bhoi, u Jagpal Singh Dhanoa, ha u kyrwoh khubor ha ka Sngi Ba-Ar, u la pyntip ba kine ki lai ngut kiba la shah kem ki kynthup ïa u Bah Cyfrank Paul Pariat, 25 snem ka rta, na ka shnong Ummat, Ri Bhoi uba dei ruh uta u ‘Self-Styled’ ‘Commander’ jong ka seng HNLC, u Bah Kitbok Mujai, 23 snem ka rta na ka shnong Ummat, bad u Bah Barnabas Lyngdoh, 49 snem ka rta na ka shnong Khyndewso, Ri Bhoi.
U Dhanoa u la pyntip ruh ba kine ki lai ngut ki dei kiba don bynta ha kata ka ‘Sleeper Cell’ jong ka HNLC ban dawa pisa bad byrngem ruh ïa ki briew ba lada kim siew ïa kumba la dawa da ka seng, kin ngat ha ka jingpynshitom kaba shyrkhei.
Utei u heh pulit ka Ri Bhoi u la pyntip ba kitei ki lai ngut kiba la shah kem ki dei kiba donkti ban pynrung kam, ban bei tyngka bad pynsaphriang ïa ki khubor na ka bynta ka seng HNLC bad kiba la leit shah hikai pyntbit ruh sha ka ri Bangladesh ha u snem ba la dep. U la ïathuh ruh ba ki bor pulit ka Ri Bhoi ki la ïoh jingbit na ka ïingbishar ban pynlong ïa ka jingtohkit kaba 10 sngi lynter ïa kitei ki lai ngut.
Halor kane ka jingjia, ki pulit ka Ri Bhoi ki ka pynrung da ka jingujor pyrshah ïa kitei ki lai ngut ha thanat Umïam (Case no. 46(06)2024) hapoh ki kyndon 120B/306 jong ka Indian Penal Code (IPC) ryngkat bad ki kyndon 10/13/17/18 jong ka Unlawful Activities (Prevention) Act (UAPA) bad ka jingtohkit ban lapdien shuh sa ïa kiwei kiwei kiba donkti ha kane ka kam ka dang ïaid shakhmat.
Na ka liang u Dhanoa u la buh ruh ka jingkyntu ïa ki paidbah ba kim dei satia ban ngop ha kine ki jingshah dawa pisa be-aiñ da ki dkhot lane ki briew kiba ïadon bynta bad ka seng HNLC bad ba ki dei ban pyntip sha ki bor pulit lada ki shah dawa pisa be-aiñ.
