Shillong, Jylliew 11
Ka Khasi Students’ Union (KSU) ka la ong ba ki MP kiba la sha jied thymmai jong ka Jylla ki dei ban buddien ïa ki mat halor ka Inner Liner Permit (ILP), Khyrnit ba 8 nalor kiwei-kiwei hapoh ïingdorbar thawaiñ Parliament.
“Ka khubor sha ki MP ka long ba ki dei ban buddien ïa ki mat ba la ïakhih paidbah kum ka ILP, ban pyllait na ka jingpyntreikam ïa ka Citizenship Amendment Act (CAA) hapoh ka Thaiñ Shatei Lam Mihngi, ka mat halor ka Khyrnit kaba 8 nalor kiwei,” la ong u General Secretary ka KSU, samla Donald V. Thabah.
Ki MP bathymmai ka Jylla ki kynthup ïa u Dr. Ricky A.J. Syngkon (VPP) na Shillong Parliamentary konstitwensi bad u Saleng Sangma (INC) na Tura Parliamentary konstitwensi.
Ha kajuh ka por, u la ong ba ki MP ki dei ban pynsngew ruh ïa ka mat halor u pud u sam, la ka long hapdeng ki Jylla ne bad ka ri ba marjan bad ba dei ban pynbeit noh ïa kane ka bynta.
Halor ka Sorkar thymmai – NDA 3.0, u samla Thabah u la ong ba ka Sorkar ka dei ban phai khmat lem sha ka bha ka miat jong ki nongshong shnong ka Thaiñ Shatei Lam Mihngi.
“Ka Sorkar kam dei shuh tang ban shu khmih bniah ïa ki mat jong ka Jylla kum ka ILP bad ka Khyrnit ba 8. Kam dei shuh ban pynslem bad ka la dei ban leh eiei noh kloi halor kine,” la ong utei u nongïalam.
U General Secretary u la ong ruh ba na ka liang ka seng shen kan sa shong jingïalang ban ïakren halor ki mat bapher-bapher ki ban pynsngew sha ka Sorkar bathymai bad kine kin ïaid lyngba ka North East Students’ Organisation (NESO).
Kum ban shu kdew hangne, ka ïingdorbar thawaiñ ka Jylla ha u Nailur jong u snem 2018, ka la mynjur ïa ka rai ban kyrpad na ka Sorkar Pdeng ban pynrung noh ïa ka ktien Khasi bad Garo ha ka Khyrnit ba 8 jong ka Riti Synshar ka Ri.
Ha kajuh ka por, ka ïingdorbar thawaiñ ka Jylla ha ka 19 tarik Nohprah, 2019 da kawei ka sur ka la mynjur ïa ka rai ban kyrpad na ka Sorkar Pdeng ban pyntreikam noh ïa ka ILP hapoh ka Jylla.
Kumba ka long mynta, kine ar tylli ki mat ki dang sahkut bad ka Sorkar Pdeng.
