Shillong, Jylliew 11
U Symbud Myntri Rangbah, Bah Prestone Tynsong, u la lum ïa ka jingïalang bad ki ophisar bad ki karikor ka PWD (Roads) ban khmih bniah ïa ki projek shna surok lyngba ka National Highway Infrastructure Development Corporation Limited (NHIDCL) ha baroh kawei ka Jylla, ha Khasi Jaiñtia Hills bad Garo Hills.
Ki projek ki kynthup ïa ka Shillong Western Bypass kaba la poi sha ka bynta ban pyllait ïa ka bai shim jaka, ha kaba ki DC jong baroh ar tylli ki district – Ri Bhoi bad East Khasi Hills – ki la nang pynïaid ïa ki kam ban pyndep ïa ka jingsiew bai jaka. Nalor kane, la ïakren ruh ha kaba ïadei bad ka jingshna ïa ka surok Dainadubi-Darogre-Williamnagar kaba dang sah ban pyndep sa katto katne ki kam kiba ïadei bad ka tnat khlaw.
La ïakren ruh halor ka surok Tura-Dalu namar ki trai jaka kim pat ai jaka ha ki katto katne ha ki bynta ba dang sah sa kumba 3 km ha kaba la bthah ïa u DC Tura ban pynsted ïa kane ka kam kaba dang dei ban pyndep bad ki trai jaka.
Shuh shuh la ïakren kham bniah ha kaba ïadei bad ka jurip jaka ban pynïaid ïa ka surok four- lane na Mawlyngkhum sha Panchgram kaba pynïasoh bad ka Assam ha kaba la thaw ïa ki Committee ha ki district kiba hap ban pynïaid ïa ka jingshna ïa ka surok four-lane na Lad Umroi shaduh Malidor.
Ki Committee ba la khlieh da ki DC ka Ri Bhoi, West Jaiñtia Hills bad East Jaiñtia Hills ki la nang pynïaid ïa ki kam bad lum ïa ki trai jaka lada mih kano-kano ka jingeh ha kaba ïadei bad ka jaka.
