Shillong, Jylliew 11
Ka Kong Bindas Syiem ka la sangeh shah thngan noh hadien hynriew sngi ba ka la shong hakhmat ka jaka ïeng kali markhap bad ka Additional Secretariat hadien ba u Symbud Myntri Rangbah ka jylla u Bah Prestone Tynsong u la kular da ka jingthoh ban shna ïa ka surok na Nongpoh, Umden shaduh Sonapur.
Katkum ka jingthoh ba la ai da ka sorkar sha ka Kong Bindas, ka surok ka long na Nongpoh-Umden bad Sonapur ka dei 59 km kaba la pynkhreh da ka NESIDS bad PMGSY-3.
Ka surok na Nongpoh sha Umden kaba 20km la pynkhreh ban shna da ka NESIDS ka ban sa mang pisa da ka tnad DoNER jong ka Sorkar India ha ka jingmang kaba T.52 klur hynrei kane ka la slem noh ban pynïaid shakhmat namar ka jingwan ka ilekshon MP Lok Sabha.
Katba ïa ka surok na Umden sha Byrnihat kaba jngai 39 km la pan pisa na ka skhim PMGSY-3 ha ka jinglut kaba T.50.95 klur.
Ha kane ka jingleit ïakynduh ïa u Bah Prestone ha Secretariat ka Kong Bindas ka la mih na jaka shah thngan ha ka por 2:00 baje nohphai sngi da kaba shong da ka shuki shu khynñiat sha ka kali kit nongpang namar kam lah ban ïaid namar ka jingtlot.
Ha kane ka jingleit sha Secretariat ka Kong Bindas ka la jied hi ïa hynriew ngut ki briew kata u President ka HYC Bah Roykupar Synrem, Bah Donbok Dkhar President ka HITO, Bah Arnold Syngkli President ka Ribhoi Youth Development and Social Organisation, Bah Mathaias Syiem uba dei u Chairman ka Synjuk Rangbah Shnong Rait Nongtluh, Kong Purity Phawa President ka STIEH, Silvenus Malai, Jason Lanok Nongrum President ka RBPC, Ferdinand Kharkamni President KSU North Khasi Hills.
Haba ka Kong Bindas ka la poi ha kamra, u Bah Prestone Tynsong uba la shong ap lypa bad ki karikor u la ïeng na jaka shong ban leit pdiang ïa ka Kong Bindas kaba shong wheelchair.
Haba ka Kong Bindas ka la mih na Secretariat ka la phuh samrkhie bad haba ka hiar na kali kit nongpang ka la kaweh kti ïa ki paidbah kiba la ap ha jaka shong shah thngan.
Haba pynbna sha ki lad pathai khubor, ka Kong Bindas ka la rai ban sangeh noh ban shah thngan hadien ba ka la ïoh ïa ka jingkular na ka sorkar jylla lyngba u Bah Prestone Tynsong bad sdang ban dih da ka sha bad jingbam.
Ha ka por janmiet ka Kong Bindas ka la mih noh na katei jaka shong shah thngan ban leit phai sha shnong.
