Shillong, Jylliew:
Ki samla pule na kane ka Jylla bad na kiwei pat ki bynta jong ka ri kiba angnud ban ïoh leit pule doktor hynrei kiba la shah pynduhlad noh namar ki kynrum-kynram kiba la mih ha ka eksamin NEET, ki la ïoh ka jingkular na u nongïalam ka Congress u Rahul Gandhi ha ka Sngi U Blei ba un sa long ka sur jong ki ha Parliament ha kaba un sa rah ïa kane ka mat kaba ktah ïa ka lawei jong ki samla pule.
U Rahul u la ther tyngeh ruh ïa u Myntri Rangbahduh u Narendra Modi ha kaba ïadei bad ka kynrum-kynram kaba la mih ha ka eksamin NEET kaba la pyndiaw ïa ki 24 lak ngut ki samla pule hapoh ka ri lem bad ka ïing ka sem jong ki.
U Rahul u kren shaphang ka jinglait tuh ki jingkylli ha kaba ki don ki khynnah kiba wan shakhmat kumba 6 ngut tang na kajuh ka jaka thoh eksamin NEET kaba ym lah ban long, wat la ka Sorkar ka kyntait ba ka don ka jinglait tuh ki jingkylli.
Ka National Testing Agency ruh ka kyntait ba ki don ki kynrum-kynram hynrei ka la pynshai pynban ba ki jingpynkylla ha ki kot pule NCERT bad ki jingai marks ei namar ka jingduh ïa ka por thoh eksamin ka dei ka daw ba ki don kiba ïoh heh bha ki marks.
U Rahul u la ong ba ka Congress ka la don ki jingpynkhreh kiba biang kumno ban leh ha kaba ïadei bad ka NEET khamtam ka jinglait tuh ki jingkylli. Ki don ruh kiwei pat ki seng kiba la rah ïa kane ka mat ha kaba ki la pynpaw ka jingartatien ïa kane ka rukom pynlong eksamin na ka bynta ban ïoh leit pule doktor ki samla.
Ka Congress ka la dawa ruh ban don ka jingtohkit hapoh ka jingkhmih jong ka Supreme Court ha kaba ïadei bad ki kynrum-kynram ha ka eksamin NEET bad ka la kynnoh ïa ka BJP ba ka la thok ïa ki samla bad ïalehkai bad ka lawei jong ki samla.
“Ngi la dep smai ha ka ‘manifesto’ jong ngi ba ngin pyllaitluid ïa ki samla pule na kane da kaba shna aiñ, bad nga kular ïa baroh ki samla pule jong ka ri ba ngan long ka sur jong phi ha Parliament ban rah ïa kane ka mat kaba long ka lawei jong phi,” la pynpaw u Rahul.
