Shillong, Jylliew 11
Ka synjuk ki nongtrei na ki skul bapher-bapher ki bym dei ki nonghikai kiba don hapoh ka shatri jong ka All Meghalaya SSA Non-Teaching Staff Association (AMSNSA), ha ka 11 tarik u Jylliew ka la mih shakhmat lyngba ki lad pathai khubor ban byrngem da kaba tyngeh ba kin mih sha madan ban pynlong ïa ka jingïakhih da kaba shong shah thngan lada ka sorkar jylla kam pynurlong ïa ka jingdawa ban pynkiew ïa ka tulop jong ki kaba la dawa naduh u snem 2023.
Haba kren sha ki lad pathai khubor, na ka liang ka Kong Jennifer J. Synrem kaba dei ka President ka synjuk, ka la ong ba ka la don kumba 8 snem eiei ba kum ki nongtrei ki khlem shah pynkiew tulop satia kaba la buh jingeh shikatdei eh ïa ki ba kin bsa bad pyndap ha ïing ha sem khamtam lei-lei ha kane ka juk kaba ki mar ki mata bad ki marbam-mardih ki la kiewdor lut nadong-shadong katba ka tulop jong ki pat kum ki nongtrei ka dang neh sah kumjuh.
Ka Kong Synrem ka la ong ba na ka liang ka synjuk ka la leit mih bad buh da ka jingthoh na ka por sha ka por sha ki bor ba halor jong ka tnad pule puthi ka jylla kata naduh u snem 2023 haduh u snem 2024. Na ka liang ki bor ba dei khmih pat ki la ong ba kane ka kam ka la ïaid shakhmat hynrei tad haduh kine ki sngi, kam shym la don satia kano-kano ka jingshimkhia.
Ka Kong Synrem ka la ong ba ka jingïoh jingsiew jong ki ka la neh beit kumjuh katba ki kam pat la bynshet ha ki tyrpeng jong ki bad namar kata kum ki nongtrei kim lah satia ban kyrngah ïa ki kam namar ki dei kiba dang hap hapoh ka jingpeit-jingkhmih jong ka tnad pule-puthi.
Ka la ong ba ka synjuk ka la buh por 15 sngi ïa ki bor ba halor ban jubab halor kane ka jingdawa bad lada kam urlong, kim banse ban shim noh da ka sienjam ban shah thngan khlem buh bor.
“Na ka Association ngim banse ban shim noh da kawei pat ka sienjam kaba lehse kaba kham tyngeh. Lehse, ka sorkar ka kwah ïa ngi ba ngin shong shah thngan noh kumto ne hynrei ngin shu ai por ïa ka sorkar hapoh ka 15 sngi”, la ong ka Kong Synrem.
Na ka liang u Bah Barikupar Mylliemngap uba dei u General Secretary ka Synjuk u la ong ba lada ka tnad pule puthi kam ai jubab eiei halor kane, ka kynhun kan sa shong biang da ka jingïalang ban shim ïa ki rai bad ki sienjam kiba kin leh. Nangta u la buh ruh ka jingkyrpad sha baroh ki nongtrei kiba don sha kylleng ki jaka ba kin long kiba la pynkhreh ban mih sha madan ha kano-kano ka por lada ka synjuk ka khot ïa ka jingïatreilang.
“Ka dei sha surok ba ngin hap ban ïakhun namar ngi ïohi kiba bun hi ki jingïakhih hapoh ka jylla jong ngi ki dei beit kiba ngi hap ban ïakhun ha surok. Lada ngim ïohi kano-kano ka dak kaba ka sorkar kan jubab ïa kane ka jingkwah jong ngi, kata ka dei ka sienjam kaba ngi hap ban shim khnang ban pynbor ïa ka sorkar”, la bynrap u Bah Mylliemngap.
