Shillong, Jylliew 11
Ka Meghalaya Human Rights Commission (MHRC) ha ka Sngi Ba-Ar ka la pyntip ba ka la pan kaiphod na ka Director General of Police (DGP) ka jylla halor ka jingjia ha ka jaka pynïeng kali markhap bad ka Additional Secretariat kaba dei ruh ka jaka ba ka Kong Bindas Syiem kaba na Ri-Bhoi ka la pynlong ïa ka jingshong shah thngan na ka bynta ban dawa na ka sorkar ban shna ïa ka surok Umden-Nongpoh-Sonapur.
Ha u kyrwoh khubor na u Secretary ka MHRC la ong ba na ka liang ka Commission ka la khot hajir ruh ïa u Superintendent of Police (SP) ka East Khasi Hills, u Rituraj Ravi, IPS ba un wan mih hakhmat ka Commission ha ka 20 tarik Jylliew.
Kum ban shu pynkynmaw u SP ha ryngkat u Officer-in-Charge ka thanat Sadar lem bad ki pulit langrut ki la leit tur sha ka jaka shong shah thngan ka Kong Bindas ha ka miet Sngi Saitjaiñ bad ki la ai daw ban phah peit ïa ka koit ka khiah jong kane ka longkmie kaba la shong shah thngan la bun sngi.
Hynrei ki paidbah kiba la don ha katei ka jaka ha katei ka miet ki la ong ba ka jingwan jong ki pulit ka long ban rah jubor ïa ka Kong Bindas. Tangba kine ki paidbah ki la ïa ai nia bad u SP bad kiwei ki pulit bad hadien katto katne por, u SP lem bad ki pulit nongbud jong u ki la phet noh na katei ka jaka.
