Jowai, Jylliew 11
Ka Kur Bamon-Suja-Phalangki ha u kyrwoh ba ka la phah ka pynrem jur ïa u briew uba donkti ban pynïap dusmon ïa ka Kong Ailem Bamon da kaba ot na ryndang kaba la jia ha ka 9 tarik Jylliew ha ka shnong Sahsniang.
Katkum ka kyrwoh, ka Kur ka la ong ba ka don hapdeng ka jingkyndit bad ka jingsngew smiej halor ka jingshah pynïap jong ka Kong Ailem Bamon ha u runar uba tip kyrteng u Wan Lathong.
Ka Kur ka ïathuh ba ka Kong Ailem Bamon ka leit ban kheit tit khlaw na khlaw na bynta ban bam, pynban kam tip ha ka jingwad ïa ka jingbam ka ngat pynban ha ka jingshah pynïap dusmon ha u Wan Lathong na ka shnong Niewkmai.
Kane ka jingleh khlem jingsngew synei jong une u ‘riew thrang snam ka buh ïa ka ïing ha ka jingsngewsih kthang kaba shyrkhei bha.
“Ngi kyrpad ïa ki bor jong ka aiñ ban pynshitom jur ïa u Wan Lathong uba suba donkti ha kane ka kam pyntriem katkum ka kyndon aiñ,” la ong ka kyrwoh.
Shuh shuh la ïathuh ba ka Kong Ailem Bamon ka dei kaba la kynduh lypa ïa ka jingeh ha ka jingim ha kaba u lok jong ka u khlem ïashong shuh bad ka, bad ka don marwei ban bsa ïa ki hynriew ngut ki khun kynthup iwei ba dang 1 snem ka rta bad iwei pat ba don ka jingduna ha ka bor pyrkhat pyrdaiñ.
Kane ka jingleh jong u Wan Lathong ym tang ba u shim ïa ka jingim jong kane ka kmie hynrei u la buh ïa kine ki khun ha ka jingeh kaba ym lah shuh ban mutdur, la ong ka Kur.
Ka Kur ka kyrpad ïa ki bor jong ka aiñ ban pynshitom da kaba tyngeh ïa utei u briew namar u long ka jingma ïa ka imlang-sahlang.
