Shillong, Jylliew 11
Hadien ba ka Sorkar NDA 3.0 kaba ïalam da ka BJP ka la shimti ban synshar, ka Sorkar MDA ruh shen kan leit pynkynmaw biang ïa ki mat kiba sahteng kum ka ILP, ka jingithuh ïa ka ktien Khasi bad Garo nalor kiwei ki mat kiba ka Jylla ka angnud ba kin urlong.
U Symbud Myntri Rangbah u Bah Prestone Tynsong u la ong ba hadien ba ki jingpynbeit kam ki la biang bad la sdang ka jingtreikam ka Sorkar NDA ha Delhi, na ka liang ka kynhun jong ka Sorkar Jylla kan leit biang sha Delhi ban ïakynduh ïa ki nongïalam ka Sorkar Pdeng naduh u Myntri Rangbahduh ka ri, u Narendra Modi, u Myntri korbar ri bad kiwei kiwei ki Myntri Sorkar kiba la shah bate ban peit ïa ka ki jong ki jong ki tnat treikam jong kane ka Sorkar kaba dang shu shimti.
Halor ka jingkynthoh u MP ka Tura u Saleng A Sangma ba ka MP barim ka Agatha K Sangma kam pat ju kren tang shisien ruh halor ka ILP, lait noh tang kaba shu phah jingthoh, u Bah Prestone u la ong ba um don jingtip kumno u Saleng u lum jingtip ba un tip ba ka Agatha ka la rah ne khlem rah ïa kane ka mat ban pynsngew sha ka Sorkar Pdeng.
U Bah Prestone u la ong ba ka NPP kaba don 2 ngut ki MP ha ka Ïingdorbar Thawaiñ Lok Sabha bad Rajya Sabha, ka la bthah ban shim ïa ki mat ban pynsngew sha ka Sorkar Pdeng la ka dei hapoh Parliament ne bad ka Sorkar Pdeng.
