Shillong, Jylliew 11
Ka Election Commission of India ka hap ban pynlong ïa ka ilekshon shiteng samoi hapoh hynriew bnai na ka bynta ban jied MLA thymmai ban mihkhmat ïa ka Gambegre konstitwensi sha ka Ïingdorbar Thawaiñ ka Jylla hadien ba u Lamphang ka Ïingdorbar Thawaiñ u Thomas A Sangma u la pdiang ïa ka shithi jong u Saleng A Sangma uba la iehnoh kum u MLA ka Gambegre.
U Saleng u la iehnoh kam ha ka 10 tarik mynta u bnai hadien ba u la shahjied kum u MP bathymmai ka Tura Lok Sabha konstitwensi. Na ka liang u Lamphang u la pdiang ïa ka shithi iehnoh kam jong u Saleng ha kaba ka Assembly Secretariat ruh ka la pynmih ïa ka jingpynbna ha ka Sngi Ba-ar.
Katkum ka jingpynbna kaba la pynmih da ka Assembly Secretariat, la pynbna ba ïa ka shithi iehnoh kam u Saleng kum u MLA ka Gambegre konstitwensi la pdiang da u Lamphang ka Ïingdorbar Thawaiñ.
Kaba bud nangne ka dei sa ka pali jong ka Election Commission of India ban pynbna ba ka Gambegre konstitwensi ka la sah thylli khlem MLA bad donkam ban pynlong ïa ka ilekshon shiteng samoi hapoh hynriew bnai na ka bynta ban jied MLA thymmai ban mihkhmat ïa ka Gambegre konstitwensi.
Ka Election Commission of India kan sa pynbna kham hadien ïa ka tarik ban thep vote na ka bynta ka ilekshon shiteng samoi ha Gambegre konstitwensi.
Da ka jingiehnoh kam u Saleng uba dei u MLA ka Congress, ka Congress mynta ka don sa tang 4 ngut ki MLA ha Ïingdorbar Thawaiñ ka Jylla bad ha ka Ïingdorbar Thawaiñ kaba don 60 ngut ki MLA, mynta ka don 59 ngut ki MLA.
Ki MLA kiba don sha ka liang synshar ki long 46 ngut bad ki MLA sha ka liang pyrshah mynta ki don sa 13 ngut.
