Tura, Jylliew 11
Hadien ka jingsangeh shipor kaba katto-katne taïew, ki kam khaïi be-aiñ sha marjan Bangladesh sa shisien ki la sdang ban paw pyrthei biang hadien ba u nongtrei mon sngewbha na Ri-lum Garo u la ujor pyrshah halor kane ka bynta ha thanat Jengjal, West Garo Hills (WGH) ha ka Lah Sngi U Blei.
U nongtrei mon sngewbha, u Nilbath Marak lyngba ka jingujor jong u, u la ong ba ka jingshalan tuh ïa u kwai, shini, masi nalor kiwei ka la sdang biang khlem sangeh wat hadien kiba bun ki jingujor halor kane ka bynta kaba dei ban shimhkia mardor ïa ka.
Hashuwa, u Marak u la ujor halor ka jingshalan be-aiñ sha u Election Commissioner ha ka 14 tarik Ïaïong, ïa kaba hadien kane, ka la sangeh shipor. Naba ki ilekshon ki la kut, lah ban sakhi ïa ki trok kiba kit bun bah ka shini, khamtam lyngba ka NH-51 kaba pynïasoh sha Paikan, Assam sha Tura bad Dalu ha WGH.
“Nga la ujor lyngba ka jingthoh sha u CECban kyrpad peitngor ïa ki trok bad kali kit shini, piat, kwai, masi lem abd kiwei-kiwei ki marbam ban pyntika bad pynshisha la ki don ïa ki kot ki sla kiba biang, laisen bad ka jingbit ban shalan sha kiwei ki ri. Ka thanat Jengjal ka dei ka jaka rung hapdeng ka North bad West bad ka dei ka bynta ha kaba ka jingpeitngor halor ka jingshalan be-aiñ ka lah ban jia,” la ong ka jingujor.
Hashuwa, utei u nongtrei mon sngewbha u la ïoh jingtip halor ka jingsdang biang jong ka jingkhaïi bei-aiñ ïa ka shini hadien jong ka dheng kali hajan Rongkhon hajan Tura kumba ar sngi mynshuwa. Katei ka dheng kali ka dei namar ka jingksiad jong kitei ki kali kit shini, la kito kiba leit sha Dalu ne Gasuapara, South Garo Hills (SGH).
“Kine ki jingdheng kali na kine ki trok ki long kiba hap ban shimkhia naba kine ki bteng wat mynmiet ruh, kaba ktah shi kat dei ïa ka suk ka saiñ jong ka thaiñ. Ka jingkhaïi be-aiñ lyngba ki lynti ka Ri-lum Garo bad kata ruh haba paw ka la pynlyngngoh ïa kiba bun ba shaei kane kan ïalam ïa ka Jylla. Hato yn sin ïa ngi kum ka jaka pdeng jong ki nongkhaïi be-aiñ? Ka Sorkar ka donkam ban leh da kaba tyngeh lym kumta ki paidbah kin sdang buh jingkylli ïa ka kamram jong ka Sorkar haba ïadei bad kane,” la ong u Nilbath haba kynjoh ktien ïa u.
