Shillong, Jylliew 11
U samla Enlang Sawiañ uba dei uwei na ki nongïasaid aiñ ka jylla bad ruh kum u Education Secretary ka Hynñiewtrep Youths’ Council (HYC) sengkmie, u la ujor sha ka Meghalaya Human Rights Commission (MHRC) halor ki kam tih khyndew beaiñ ha ka shnong Killing, Baridua, Pillangkata bad Umtyrnga kiba hap hapoh ka Ri-Bhoi District kaba la ktah ïa ka koit ka khiah jong ki nongshong shnong ka thaiñ.
Kane ka jingleit ujor jong une u nongïasaid aiñ sha ka Commission ka dei hadien ka jingïoh pdiang jong une u samla ïa ka jingud-jingnam jong ki paid nongshong na ki katto-kattne ki bynta jong kine ki shnong halor ka jingbteng jong ka jingtih beaiñ ïa ki lum ha kine ki shnong, kaba la ktah ïa ka koit ka khiah jong ki nongshong shnong jong kine ki shnong khamtam ïa ki khynnah bad ki ‘riew tymmen kiba la hap ban ring mynsiem da ka pum-pum khyndew ha baroh shi-lynter ki surok shnong kiba la pynmih na kine ki jaka tih khyndew beaiñ ban kit pat da ki spah tylli ki trok bad ban shallan shapoh ka jylla Assam.
Shuh shuh la ong ruh ba ym tang ba kane ka jingtih khyndew beaiñ ïa ki lum ka la ktah ïa ka koit ka khiah jong ki nongshong shnong, hynrei ka la ktah ruh ïa ki tyllong um kiba ju bsa ïa ka umbam-umdih sha ki nongshong shnong jong kine ki shnong. Namar la shem ba kiba bun ki tyllong um ki la rngat noh na ka jingtih beaiñ ïa ki lum ban khlong khyndew khlem da ïoh jingbit satia na ka tnad Forest and Environment Department jong ka sorkar jylla halor ki kyndon ba ki dei ban bud hashwa ban tih khyndew na ki lum.
Kane jingtih khyndew beaiñ ka long ruh ka jingpynkheiñ ïa ka hok longbriew-manbriew jong ki nongshong shnong jong kine ki shnong katkum ka kyndon jong ka Article 21 jong ka riti synshar ka Ri kaba dei halor ka “Right to life” lane ka hok ban im kaba kynthup ruh ïa ka hok ban im laitluid ha ka sawdong-sawkun kaba khuid kaba suba (Right to live in a clean Environment) khlem da shah ktah ïa ka koit ka khiah jong ki paid nongshong shnong, katkum ka hok jong uwei-pa-uwei u nongshong shnong ka Ri India ïa kaba la pynkhamti hapoh ka riti synshar jong ka Ri.
Ha kaba ïadei bad kane ka jingujor ba la phah da u samla Enlang Sawian, ka Commission ka la dep ruh ban phah da ka jingthoh sha u Deputy Commissioner ka Ribhoi District bad bthah ruh ïa u Deputy Commissioner ban pynlong da ka jingtohkit mardor bad kumjuh ban ai da ka kaiphod halor kane ka jingujor hapoh ka 15 sngi sha ka Commission. Nangta na ka liang ka Commission ka la buh sngi ruh ba ha ka 24 tarik mynta u bnai kan bishar halor kane ka jingujor jong une u samla.
