Shillong, Jylliew 12
Wat la u Skhemlang L Nonglait um don kjat bad ka lbong naduh dang kha, hynrei namar ba u thrang ïa ka jingstad u la mih na la ïing na ka shnong Umlatar kaba hap ha Mawhati, Ribhoi District ban leit pule ha Ferrando Speech and Hearing Centre kaba don ha Umniuh Khwan, Umsning Block, Ribhoi District.
U Skhemlang L Nonglait u dang dap 16 snem ka rta bad mynta u shong klas-6 ha Ferrando. U don lai ngut shipara bad ma u, u dei uba nyngkong, ka kmie bad u kpa ki dei tang ki nongrep.
Haba ïakren bad u Skhemlang u la ïathuh ba u shong haduh klas-5 ha shnong hynrei namar bym don klas shuh um don lad shuh ban leit sha kiwei ki skul ba marjan namar ka jynjar ban leit buh leit shaw khamtam ha ka por slap namar u hap ban shu par da ka kti.
“Naduh dang kha haduh ba nga la heh nga hap ïaid da ki kti lada dei ha ïing, nga leit sha kper ban ïarap thung jingthung ha kper ne ban leit sha skul” u la ong.
U la ïathuh haba u ïaid ban kyrshan da ki kti ha madan um don jingwit ne jingthut hynrei ka pynthut tang lada wan u slap bad pang lada thar ki maw bad ki dieng.
Shuh shuh u la ïathuh ba namar bym don klas shuh ha shnong, ka kmie ka la phah skul noh sha Ferrando mynta u snem khnang ban bteng ïa ka jingpule.
“Haba nga wan nyngkong nga shem jynjar ban sngewthuh haba nga shong klas lang bad ki para khynnah ki bym lait kren bad bym ïoh sngew hynrei da ka jingïarap ban batai ïa ka jingpyni da ki shympriah kti (sign language) nga la lah ban sngewthuh mynta” u la ong.
U Skhemlang u don jingkyrmen ba un lah ban pyndep ïa ka jingpule haba u la wan pule sha Ferrando.
U la ïathuh ruh ba ka rukom hikai ha kane ka skul ka long shisha kaba sngewtynnad namar ki para klas ki la ïarap ban batai haba um sngewthuh ïa ka rukom pyni da ki kti.
