Nongstoiñ, Jylliew 12
Uwei u rangbah na ka shnong Nongkroh, Rambrai, West Khasi Hills u la duh noh ïa la ka jingim hadien ba u pyrthat u la pom kynsan katba u dang don ha kper kaba u trei.
Katkum ka tyllong khubor ba la ïoh lum, la ong ba ïa utei u rangbah uba la duh la ka jingim la tip kyrteng kum u Bah Kantly Maram (49 snem ka rta).
Shuh shuh ka khubor ka ong ruh ba katei ka jingjia ka la jia ha ka 12 tarik u Jylliew, 2024 ha ka por kumba 1.00 baje mynsngi.
Ka khubor ka ïathuh ruh ba halor katei ka jingjia, na ka liang ki bahaïing ki la dep ban pyntip ruh sha ki pulit ha kaba ki pulit ruh mar-mar ki la leit sha katei ka jaka bad hadien ba la pyndep ïa ki jingdonkam la pynkit noh ïa ka met kaba dang sah jong utei u rangbah sha Civil Hospital Nongstoiñ.
