Jowai, Jylliew 12
Sa kawei ka longkmie kaba shah sumar ha Halfway Home kaba don ha ka shnong Sabahmu-swang, West Jaiñtia Hills kaba pynïaid da ka Society for Urban Rural & Rural Empowerment (SURE), sa shisien ka la ïakynduh biang bad la ki bahaïing hasem hadien ba ka la jah na la ïing la lai snem kynthih.
Kane ka longkmie ka dei ka Kong Glorina Martina Shadap Kholar kaba na West Karbi Anglong jong ka jylla Assam.
Ïa kane ka longkmie la aiti sha ki bahaïing ha ka jingdonlang ka District Social Welfare Organisation (DSWO) ka Kong. R. Passah, u Rolinson Teron, ki bahaïing hasem bad u John Teron uba dei u hep kynsi jong ka Glorina Shadap Kholar.
Ka Kong Glorina Shadap Kholar ka don ïa ka jingshitom Chronic Schizophrenia. Ka la shah sumar ha MIMHANS naduh ka 7 tarik Lber, 2021 bad la pynkynriah noh ïa ka sha Halfway Home Sabahmuswang ha ka 11 tarik Risaw, 2023.
Ha ka 15 tarik bad 17 tarik Nailar, 2023 katba dang ïasyllok bad ka Kong Ilasiewdor Gashnga, ka la ïathuh ba ka Kong Glorina Shadap ka dei na ka shnong Umswai, Amsohbra kaba hap hapoh ka Karbi Anglong. La ong ruh ba ka la ïathoh shongkurim arsien bad u (Late) Romin Marak, hynrei hadien ka jingkhlad noh jong u lok banyngkong, ka la ïathoh bad u Lenus Malang na ka jaitbynriew Tiwa bad ka don lai ngut ki khun.
Ka Kong Glorina ka la ïathuh ba ka don kawei ka hynmen kaba tip kum ka Regina Shadap bad u lok jong ka, u John Teron ba sah ha Trilate. Ka la ïathuh ba ka kynmaw ïa ka por ba ka shah rah ha ki pulit sha MIMHANS hynrei mynta ka kwah ban leit phai sha la ïing.
Kumta la pyntip sha uwei u Karbi uba shong ba sah ha Jowai, u Rolinson Teron, uba la wan ban ïakren bad ka Kong Glorina. Hadien kane, ka Kong Glorina ka la ïohlad ban ïakren bad ki bahaïing hasem bad la pynbeit ruh ban wan shaw ïa ka.
Ka Celina Kholar ka para jong ka Kong Glorina, ka la ïathuh ba ka Kong Glorina ka la jah naduh u snem 2021 bad ki la wad ïa ka kylleng ki jaka, bad ki la pyrkhat ba ka la khlad katba u khun jong ka u Nelson Kholar u la ong ba u kmen ban ïohi biang ïa ka kmie.
Lah ban pynkynmaw ba ha ka 17 tarik Jymmang, 2024, ka Halfway Home Sabahmuswang ka la lah ban pynïakynduh biang ïa ka Jiratan Bibi kaba na Kowarpur, Kamapur, Kamrup District Assam bad la ki bahaïing hasem hadien ba ka la jah lai snem na la ïing.
