Nongstoiñ, Jylliew:
Ka jingpynrung jong ki paidbah nongshong shnong ïa u ‘Aadhar’ hapoh West Khasi Hills ka la nang kiew na kawei ka sngi sha kawei pat haba ïanujor bad kine ki snem ba la dep.
U Bah Garod LSN Dykes IAS, Deputy Commissioner ka West Khasi Hills haba kren ha u nongthoh khubor u la ïathuh ba kum u khlieh ka District mynta la kumba shi snem hynñiew bnai, u la don hapoh ka WKH bad haba ïa nujor bad u 2022 ha ki bnai Naiwieng, Nohprah, ka jingpynrung ka long 50%, hynrei haduh mynta la poi sha ki 70% tam bad ka don ka jingkiew.
“Ka thong ka jong ngi ka long ba hapoh ka distrik, nga kubur ba ki don katto-katne ki bynta kiba ngim lah ban ïoh 100% hynrei 90% ngi dei ban ïoh bad ngi buh ïa kane ka thong ba haba kut une u snem, ngi dei ban ïoh ïa ka 90% ïa ka jingpynrung ïa u ‘Aadhar’ hapoh ka distrik baroh kawei,” la ong u Bah Garod.
Shuh shuh u la bynrap, “Hooid ki don kiwei ki jingkren ki jingbatai bad ka dang don hapoh ïingbishar ba donburom ka Supreme Court bad kiwei-kiwei, hynrei ngi ïohi bad la ïaid lynti ruh ba ki bun ki skhim la ka dei ka 100 sngi, ka PMYG, ka MHIS , ki baibam bad kiwei-kiwei, baroh kine ki la treikam bad ka pynpaw hi ba katba nang mih ki sngi ba jan baroh kine ki skhim Sorkar khamtam jong ka Sorkar India, u ‘Aadhar’ hi u la treikam.”
