Shillong, Jylliew 12
Ka seng Hynñiewtrep Youths’ Council (HYC) khlem shongthait ka la ïai bteng ban khynra drok kumba ka la dep ban pynbna ïa ka thma pyrshah ïa u drok kaba la bteng tad haduh kine ki sngi. Kane ka seng ka la pynlong ïa ka jingkhynra drok ha kylleng ki jaka jong ka nongbah Shillong bad kumjuh ha ki distrik bapher-bapher. Kumta ha ka miet jong ka 11 tarik u Jylliew 2024, ka seng ha ryngkat bad ki bor shnong jong ka Lawmali ki la ïoh bat ïa ki nongdih bad ki nongkhaïi drok hapoh ka shnong.
Ha kane ka jingkhynra, ka seng ka la ïoh ban kurup ïa ki thyrnia injek na ka met jong kine ki briew ha ryngkat ki tiar pynmynsaw kiba kynthup ïa u nar rot, ka kurat, ki tari, ka pisa, u kynja, ka kyiad nalor kiwei-kiwei jingdih pynbuaid.
Ka seng ha ryngkat ka jingïatreilang bad ki bor shnong ka Lawmali ki la ïoh ban bat haduh 16 ngut ki samla kiba dei ki Khasi bad katto-katne ngut ki bar jylla kiba dei ki nongdih kynthup bad ki nongdie ruh kumjuh kiba dei na ki jaka bapher-bapher kiba la wan pat ban dih drok hapoh u pud u sam jong ka shnong.
Ha ka jingïakren bad u samla Banpherlang Lyndem, Secretary ka VDP Lawmali Pyllun, u la ïathuh ba ka shnong barabor ka ju pynlong ïa ka jingkhynra ïa ki nongdih drok ban tehlakam hynrei ka shnong kam lah ban leh ïa kane lada khlem ka jingïatreilang bad ki sengbhalang, ki samla jong ka shnong kiba la ju trei shitom ban khynra bad ban rat dyngkhong ïa kiba kum kine ki jingsniew.
Shuh shuh la ong ba kum ki nongshong shnong ki don ka jingtieng ban ïaid lynti ha ka por mynmiet namar ba la jyllei palat ki nongdih drok kiba ju rah bad pyndonkam ïa ki tiar pynmynsaw.
U samla Banpherlang Lyndem u la ïathuh ruh ba ka shnong ka ju mad ïa ka jingshah tuh ki tiar ki tar na ka por sha ka por bad wat ka CCTV lane kata ka kor ring dur khih ba la pyndait hapoh ka shnong ruh dang shen, ki nongdih drok ki la ot ïa ki waïar jong katei ka kor ring dur.
Kumta, ka shnong ka la ai ka jingkhublei kaba kyrpang ïa ka seng HYC kaba la wan ban khynra ïa kine ki briew kiba dih drok.
Na ka liang ka seng ka la thang bad pynjulor noh ïa kitei ki jingdih baroh kiba la ïoh ban kurup na kitei ki samla.
