Shillong, Jylliew 12
Ka Voice of the People Party (VPP) ka la ther tyngeh ïa ka National People’s Party (NPP) halor ki jingkynthoh ba ki 2 ngut ki MP kiba la shah jied thymmai kin hap shong ha ka liang pyrshah, bad lehse kin ym lah ban wanrah ïa ka roi ka par sha ka Jylla.
“Kine ki briew kim sngewthuh ïa ka Sorkar synshar paidbah. Kum ki nongmihkhmat la ki don ha ka Sorkar ne ka liang pyrshah, kane ka dei na bynta ka bha ka miat jong u paidbah,” la ong u nongaiktien ka VPP, Dr. Batskhem Myrboh.
U la ong ruh ba ki briew kiba kren ha katei ka rukom ki ïaid ha ka rukom pyrkhat ba kin shakri tang ïa ki konstitwensi kiba la jied bad kyrshan ïa ki.
Ha kajuh ka por, u la ong ba kine ki jait nongmihkhmat kim shakri na bynta ka bha ka miat jong u paidbah hynrei tang na bynta ki nongkyrshan jong ki bad kumta kim long satia kiba bit ban long nongïalam.
“Lada phi long uba bit kum u nongïalam, kata phi sngewthuh ïa ka bynta jong ka liang pyrshah. Da ka jingdon jong ka liang pyrshah kaba khlaiñ, ka Sorkar kam lah ban leh ha la ka mon ne leh donbor haba ïadei bad kano-kano ka bynta,” u la ong.
Kum ban shu kdew hangne, u nongïalam ka NPP bad Myntri ka Sorkar Jylla, u Rakkam A. Sangma ha kine ki khyndiat sngi ba la dep u la kynthoh ba wat la ka jingkhmih lynti jong u paidbah ka long kaba jur, hynrei baroh 2 ngut ki MP – Shillong bad Tura kin hap shong ha ka liang pyrshah bad ka long kaba eh ban ong la ki lah ne em ban wanrah ïa ka roi ka par sha ka Jylla.
Haba kdew ba ki paidbah ki donkam ïa ka jinglaitluid bad ki hok bapher-bapher, u Dr. Myrboh u la ong ba ha ka synshar paidbah, ka kamram jong ka liang pyrshah ka long ban peitngor ïa ki mat treikam ka Sorkar kiba long pyrshah paidbah.
“Lada kita ki nongïalam ka NPP ki kren ha kane ka rukom, ka mut ba kim pat sngewthuh ïa ka nongrim jong ka Sorkar nongmihkhmat paidbah,” u la ong.
Haba ban biang ba ka long ka jinglehraiñ ïa ki nongïalam ban kren ha katei ka rukom, u nongaiktien ka VPP u la ong ba kane ym tang ba ka long pyrshah ïa ka synshar paidbah hynrei ka ïalam bakla ruh ïa kiba bun balang.
“Kane ka long tang ka jingkren khyllung-khynnah bad kaba bakla, bad ka pyni ïa ka jingbym don ïa ki nongrim ban long nongïalam,” u la ong.
Haba kynthoh ba utei u nongïalam ka NPP (Rakkam) u ju mlien ban pynmih ïa ki kyntien ki bym don nongrim, u Dr. Myrboh u la ong ba na ka liang u Myntri Rangbah u la dei ban khang ïa u ban kren ha katei ka rukom.
Shuh shuh u la bynrap, “Ban da dei nga u Myntri Rangbah, nga la ong ha u ba um dei ban kren sha ki lad pathai khubor.”
“Ki paidbah ki jied ïa kine ki 2 ngut ki MP da ka jingshemphang halor ka jingdonkam jong ki briew ka Jylla bad jong ka Ri India hi baroh kawei. Ki sngewthuh ïa ka dor jong ka jinglaitluid ha ka rukom im nalor ka roi ka par. Ban kren kumba kren u Rakkam, ka thew ba baroh ki nong India kin hap jied ïa ki MP ki ban don ha ka liang synshar ban ïoh ïa ka roi ka par bad kane ka long ka jingma ïa ka synshar paidbah. Ban wanrah ïa ka roi ka par ka dei ka kamram jong ka Sorkar,” u la ong.
