Shillong, Jylliew 12
Ka State Cancer Society of Meghalaya bad ka Oncology Department, Civil Hospital, Shillong ha ka Sngi Balang ka la rakhe ïa ka ‘National Cancer Survivors Day’ ha DAE-Civil Hospital Cancer Wing, Civil Hospital Shillong halor jong ka phang, “A Celebration of Life”.
Ha kane ka sngi, ka Myntri ka tnad ka koit ka khiah, Dr. M. Ampareen Lyngdoh, ka la long kum ka kongsan.
Haba ai jingkren ha ka jingïalang, ka Dr. Lyngdoh ka la ong ba kane ka sngi ka long ka jingrakhe na bynta kito kiba la ïakhun bad jop bad ruh ban ïarap wanrah ïa ka jingkyrmen ha kito kiba dang ïakhun ïa kane ka jingpang.
Ka la ong ba ka jingïakhun pyrshah ïa ka bampong kam dei ka jingïakhun shimet, hynrei ka Sorkar ka minot ban pyntikna ha ka ban pynbiang sha ki paidbah ïa ka jingsumar kaba paka tam na bynta kane ka jingpang.
Ka Myntri ka la ong ruh ba ka Sorkar ka ïaleh katba lah ha ka ban wanrah ïa ki tiar sumar kiba katkum ka juk mynta lem bad kiwei-kiwei ki lad jingsumar sha man la ki distrik jong ka Jylla.
Ha kajuh ka por, ka Myntri ka la pynpaw ruh ka jingsngewnguh ïa ka jingtrei shitom ki doktor, nos bad baroh ki nongtrei ka koit ka khiah ha ka ban pynbiang ïa ka jingsumar, ka jingkitkhia bad ka jingkyrshan ïa ki nongpang.
Ha ka jingkren jong u, u Principal Secretary ka tnad ka koit ka khiah, u Sampath Kumar u la ban jur ba ka jingpeit bniah kaba na ka por sha ka por bad ka jinglap kloi ïa ka jingpang ka lah ban pynkoit ïa ka bampong.
U Kumar u la ong ruh ka Sorkar ka pyrshang ha ka ban pynbiang ïa ki lad jingïarap lyngba ka Cancer Wing jong ka Civil Hospital, Shillong na bynta palat 7000 ngut ki nongpang man u snem.
U la ong ruh ba ka jingpynlut na ka jingmang ha ka liang ka koit ka khiah jong ka Sorkar Jylla ka la jan kot 9% na ka jingmang ka Jylla.
Ha kane ka sngi, kito kiba la koit na kane ka jingpang ki la wan shakhmat ban ïasam ïa ki khana jingjop jong ki, kumno la lap ïa ka jingpang bad ka jingsumar ha kaba ki la kyntu bad ai mynsiem ïa kiwei pat kiba dang shah sumar ban skhem jingmut khnang ban lah ïakhun pyrshah ïa ka jingpang.
Kiwei-kiwei kiba la ai jingkren ki kynthup ïa ka Head of Oncology Department, Civil Hospital Shillong, Dr. A. Mawlong bad ka Director of Health Services (MI), Dr. F. V. Kharshiing.
