New Delhi, Jylliew 12
Kumba 40 ngut ki nong India ki la khlad katba 50 ngut ki la mynsaw hadien ba ka la don ka jingpluh ding kaba shyrkhei ha ka ïing mala ba shong ba sah da ki nongtrei bylla ha nongbah Mangaf kaba don ha ka Ri Kuwait, la ong ka tnat bari ri jong ka Sorkar Pdeng ha ka Sngi Balang.
Katei ka jingpluh ding ka la sdang ha ka por kumba 9 baje mynstep (por ha Ri India), bad ka jingkhlad jong ki briew ka la kot sha ka 49 ngut.
Katkum ki khubor, la ong ba ka ding ka la sdang na ka kamra shet ja ha katei ka ïing kaba don hynriew mala, bad kiba shong ba sah ki don kumba 195 ngut, bad ki dei kiba trei bad kawei ka kompani. La ong ba kiba bun ki la khlad namar ka jingïoh ring mynsiem da ka tdem katba ki dang ïohthiah.
Na ka liang u Myntri Rangbahduh, u Narendra Modi, u la pynlong da ka jingïalang mynta ka miet ha ka ïing sah jong u bad u la pynbna ba ka Sorkar Pdeng kan ai mar T. 2 lak sha ki bahaïing hasem jong kitei ki nong India kiba la khlad.
Nalorkata, ka Sorkar Pdeng ka la pyntip ba katkum ka jingbthah jong u Modi, u Myntri Khynnah ka tnat bar ri, u KV Singh, un leit mardor sha Kuwait ban peit ba ïa ki met kiba sah jong kito kiba la khlad kin phah kham kloi sha India bad ban leit jngoh ruh ïa kito kiba la mynsaw.
Shuh shuh la ïathuh ba ïa kito kiba la mynsaw la kit sha ki san tylli ki Hospital sorkar kiba don ha Adan, Jaber, Farwaniya, Mubarak Al Kabeer bad Jahra ha Kuwait. Ka sorkar Kuwait ka la ong ba kiba bun na kiba la kit sha hospital ki dei ki bym da don than hapdeng ka jingshitom.
U Sheikh Meshal al-Ahmad al-Jaber al-Sabah, u Emir ka Kuwait, u la hukum ïa ki bor ba dei khmih ba kin tohkit bniah halor katei ka jingjia bad u la ong ba kito kiba hap ban shim jingkitkhlieh halor katei ka jingpluh kin sa shah pynshitom.
Ka kotkhubor ‘The Kuwait Times’ ka la pyntip ba u Sheikh Fahad Al-Yousuf Al-Sabah, uba dei u First Deputy Prime Minister, u la ai hukum ban kem ïa u trai jong katei ka ïing, u nongpeit nongkhmih ïa katei ka ïing bad u trai jong kati ka kompani katba ym pat dep ban peit bniah ïa ki sabut kiba lah ban ïoh na katei ka jaka ba pluh.
Ki don kumba 10 lak ngut ki nong India ha Kuwait, bad kumba 9 lak na ki nongtrei/nongbylla ha Kuwait ki dei na India. Kiwei pat kiba la khlad ha katei ka jingjia pluh ding ki dei na Pakistan, Philippines, Egypt bad Nepal.
