Nongstoiñ, Jylliew:
Ha ka 11 tarik u Jylliew, 2024 ka St. Xavier’s Secondary School, New Nongstoiñ ka la ïoh biang ban kyntiew kyrdan ïa ka skul na ka Secondary sha ka Higher Secondary ïa kaba kane ka skul ka la ïoh ban pynkha biang sa artylli ki klas na ka bynta ki khynnah pule klas XI bad XII.
Ha katei ka sngi, u Phadar James Anderson Syiemlieh, Mission Procurator ka Nongstoiñ Diocese u la long kum u kongsan.
Lah ban kdew hangne ba kane ka jingkyntiew kyrdan ïa katei ka skul lehse kan pynmyntoi shibun na bynta ki khynnah kiba pyndep ïa ka klas X namar lyngba katei, ym da donkam shuh ban leit wad klas sha kiwei pat ki shlem. La ong ruh ba kane ka jingkyntiew kyrdan ka dei ruh shi bynta kum ka dak kaba pynsah jingkynmaw ïa ka jingkynjoh ïa u mawmer 25 snem ïa kaba dang shen ka skul ka la dep ban plie ïa ka jingrakhe jubili rupa.
U Phadar James haba kren kum u kongsan u la ong ba ka pule puthi ne ka jingnang jingstad ka long kaba kongsan ha ka jingim u khun bynriew namar kata ka long kaba donkam ban pynnang pynstad ïa la ki khun namar lyngba ka pule-puthi, ka wanrah ka jingkylla ïa u briew shimet, jingkylla ha ka ïing ka sem, jingkylla ha ka imlang-sahlang bad ha ka pyrthei salonsar.
Na ka liang jong u Phadar Rolandus Lyngdoh, Principal ka St. Xavier’s Higher Secondary School, New Nongstoiñ u la ïathuh ba ki nonghikai ha katei ka Shlem ki dei kiba lah dep ïa ki kyrdan kiba la bit la biang kum ka B.ed , M.A, NET bad kiwei bad kyrmen ba kane ka Shlem kan ïa ryngkat kyrdan bad kiwei pat.
U la ong ruh ba ïa kane ka skul la seng khnang na ka bynta kiba duna ha ka ïoh ka kot bad ka dei ruh ka skul kaba ha ka jingsiew kaba rit tam ha ka bai skul baroh shi snem haba ïa nujor bad kiwei pat ki skul kiba don ha ka thaiñ bad haduh mynta ki la don haduh 49 ngut ki khynnah kiba la wan rung ha ka klas XI.
