Shillong, Jylliew 12
U nongïalam ka National People’s Party (NPP) u Bah Sniawbhalang Dhar u la ong ba lyngba ka jingjop ka VPP ha ka ilekshon MP kan pynlong ïa ka seng ban nang trei bha shuh shuh bad ha kajuh ka por kan long kum ka lad ban pule bad tip ïa ki jingduna bad ki jingbakla khnang ban lah ban pynbha.
Haba kren sha ki lad pathai khubor ha ka Sngi Balang, u Bah Sniawbhalang uba dei u National General Secretary ka NPP bad u Symbud Myntri Rangbah, u la ong ba wat lada ka lah ban don ka jingktah khyndiat ha ka ilekshon MDC ban sa wan, hynrei ha ka ilekshon MLA ha u snem 2028 kan nym don jingktah satia namar ka por ka dang don sa saw snem duna.
U la ong ba ym lah ban pynïasoh ïa ka ilekshon Lok Sabha bad ka ilekshon MLA ha u snem 2028 hynrei u kubur ba ka VPP ka don ka lad ban kham pynbun ïa ki konstitwensi kiba kan jop. Hynrei u la ong ba ym lah ban kheiñ troiñ namar kiwei ki seng ruh kum ka NPP, UDP bad kiwei kiwei kin trei shitom ban pynkhlaiñ da kaba pynbeit ïa ki jingduna.
Halor ka jingjop kput ka VPP bad ka jingbym lah ka NPP ban jop kum ka seng kaba lamkhmat ïa ka Sorkar, u Bah Sniawbhalang u la ong ba kum kane ka jingjop kam dei shuh kaba thymmai ha Meghalaya da kaba ai nuksa ïa ka ilekshon MP ha u snem 2019 ha kaba u Bah Vincent H Pala u la jop kput ïa u kyrtong ka MDA uba kyrshan lang da ki seng kiba don ha ka Sorkar.
“Ngi dang kynmaw ba ha ka ilekshon MP, 2019, u kyrtong ka Meghalaya Democratic Alliance u ïakhun pyrshah ïa u Bah Vincent H Pala ha kaba ka Congress ka don ha ka liang Pyrshah, hynrei u Bah Pala u la ïoh haduh 4 lak vote tam bad ka dei ruh ka jingjop ba bun bha, katba u kyrtong ka MDA u la jop tang na Khliehriat konstitwensi. Hynrei ha ka ilekshon MLA 2023, ka Congress kam shym la lah bad ha kane ka ilekshon MP 2024 ka Congress kam long shuh kumjuh kumba long ha katai ka ilekshon. Namarkata, ka ilekshon MLA, MDC bad MP ki ïapher bad kam mut ba haba ka VPP ka jop ha ka ilekshon MP, kin ïoh ïa kajuh ka vote ha kiwei ki ilekshon ban sa wan,” u la ong.
Haba kylli halor ki jingkular jong ki seng saiñ pyrthei kynthup ka VPP kaba pynlong ban jop kput, u Bah Sniawbhalang u la ong ba ki paidbah ki la stad ban ïa kaba pyrkhat kiwei, bad ki la dep buh jingkynmaw ruh mano ba kular kumno ha ka por ilekshon, bad kane ka dei ka bor kaba ym dei ban kheiñ troiñ ïa ki nongthep vote. Une u nongïalam ka NPP u ai khublei ïa u Dr. Ricky AJ Syngkon, halor ka jingshah jied kum u MP bathymmai ka Shillong, bad u ong ba dei ban burom ïa u paidbah uba ai ïa ka rai, bad kyrmen ba u MP bathymmai un lah ban pynurlong ïa ki jingkular ha ka por ilekshon kiba ka VPP ka la khlei sha ki paidbah.
U ai khublei ruh ïa ka NPP bad ki nongkyrshan wat lada khlem lah ban jop hynrei ki la ai ka jingshaniah ha kaba ha Nartiang ki la kyrshan 11 hajar vote na ka bynta ka Kong Ampareen Lyngdoh kaba long ka kyrtong.
Shuh shuh u kular ba ka NPP kaba lamkhmat ïa ka Sorkar kan ïai bteng ban trei na ka bynta u paidbah ka Jylla khlem jingleh shiliang bad kum ka seng kan sa khmih bniah hangno duna bad kiei ki jingbymbiang khnang ban lah ban pynbeit. “Lada jop ne rem, donkam ban phaidien bad khmih bniah bad yn pyrshang ban pynbeit ïa baroh ki jingduna kum ka seng bad kum ka Sorkar ruh,” u la ong.
