Shillong, Jylliew:
Ka jingleh donbor jong u Superintendent of Police (SP) ka East Khasi Hills District, u Rituraj Ravi ban leit kyndang ïa ka Kong Bindas Syiem na ka jaka ba ka shong shah thngan hajan ka Additional Secretariat ha ka miet jong ka 8 tarik u Jylliew, ka la pynlong ïa u samla Enlang Sawain uba dei uwei na ki nongïasaid aiñ bad ha kajuh ka por kum u Education Secretary ka Hynñiewtrep Youth Council (HYC) sengkmie, ha ka 10 tarik u Jylliew, ban leit buh da ka jingthoh sha ka Meghalaya State Women’s Commission (MSWC) kaba dei peit ïa ki ‘riew kynthei ba kan tuklar ban weng mardor ïa utei u heh pulit na ka kam SP.
Haba kren sha ki lad pathai khubor hadien ka jingwan buh ïa ka jingujor hakhmat ka Commission, u samla Enlang Sawïan u la ong ba ka jingwan buh ïa ka jingujor da ka seng ha ka Women’s Commission ka dei ba ka seng ka la ïohi ba utei u SP lem bad kiwei ki pulit ki la leit sha katei ka jaka ba shong shah thngan ka Kong Bindas Syiem khlem ka jingdon ryngkat ki pulit kynthei bad u la ong ba kane ka jingleh jong kitei ki pulit ka long kaei-kaei kaba ym lah satia ban pdiang dalei-lei namar ki lah wan ha ka por shiteng mynmiet.
U samla Enlang u la ong ba ka jingwan jong kitei ki pulit ha katei ka miet ki khlem shym la wan satia da ka met suda hynrei ki la wan ïalam ruh da ka Special Operation Team (SOT) da kaba ki la kieng atiar bha kum shibynta ban pyntieng pynsmiej ïa katei ka longkmie.
“Ngi kwah ban buh ka jingkylli sha ka tnad pulit ba hato i Kong Bindas Syiem i dei i riew sniew ba phin hap ban wanrah da ka kynhun ha kato ka jaka ba i shong shah thngan?”, la buh jingkylli utei u samla.
Utei u samla u la ong ba kum ka seng kan nym lah satia ban pdiang ïa kitei ki jingleh jong ka tnad pulit bad kumta na ka liang ka seng ka la shim da katei ka sienjam ban ujor da ka jingthoh sha ka Women’s Commission.
Shuh shuh u samla Enlang u la ïathuh ruh ba na ka liang ka Chairperson bad ki dkhot ka Commission ki la pdiang ïa katei ka jingujor ka seng ha kaba ïadei bad ka jingjia ba la leh da ka tnad pulit ïa ka Kong Bindas Syiem.
“Na ka liang ka Commission ka la ai jingkular ïa ngi ba kan sa shim da ki sienjam kiba tyngeh pyrshah ïa kane ka jingleh jong ki bor pulit ïa i Kong Bindas Syiem”, la ong u Bah Enlang.
U samla Enlang u la ong ruh ba kitei ki pulit ki la pynkheiñ ïa ka aiñ da kaba wan ha ka por shiteng miet khamtam ha kaba ïadei bad ka kam kaba ïadei bad ki riew kynthei.
Utei u samla u la ong ba ha ki sngi ba ka Kong Bindas ka la sdang ïa ka jingïakhih, la ïohi ba ki pulit kynthei ki la wan ban ïakren bad katei ka longkmie kynthup ruh ïa ki doktor kynthei kiba la ban ïakren ha kaba ïadei bad ka koit ka khiah jong ka hynrei kaba sngewlyngngoh ka long ba ha katei ka shiteng synñia, na ka liang ka tnad pulit kaba don tang da ki shynrang suda ha ryngkat ka jingkieng atiar bad ka jingkah durkhmat, ki la wan da ka jingshoh khawiang ban ïakren.
“Ngin nym ailad dalei-lei ba ki bor ka aiñ kin thombor pyrshah ïa ki riew paidbah la ka dei ha kano-kano ka liang”, la ong u samla Enlang.
U la ong ba lada ki bor ka aiñ ki dang ïai bteng ban pyndik ïa ka Kong Bindas Syiem ha ka jaka ba ka shong shah thngan, ka seng ruh kan sa leh da kaba tyngeh.
