Shillong, Jylliew 12
Uwei u khynnah samla uba la shah bat ha ka seng Hynñiewtrep Youths’ Council (HYC) ha ka miet jong ka 11 tarik u Jylliew ha ka por ba pynlong jingkhynra drok ha kawei ka jaka kaba don ha nongbah Shillong, u la phla sha ka seng ba u dei u nongkhaïi bad u nongpyndonkam ïa u drok bad u la im ïa ka jingim ha ryngkat bad u khñiang jingpang HIV bad don ka jingpang dohnud.
U la ïathuh sha ka seng ba u la ïaid sakma na la ïing la sem mynta la kumba 3 snem da ka mon laitluid lade namar ka jingngop ha une u jait jingdih ba sniew bad u ju sah kat shaba lap ba shem.
U la ïathuh ba u ju tam tiar jot na surok hynrei namar ka jingbym ïoh pisa bha, kumta ka la pynlong ïa u ba un khaïi drok khnang ba un lah ban im bad ban dih ïa u drok.
Haba ka seng ka la kylli na utei u samla la u kwah ne em ban kylla bad ban phai noh sha ka jingim kaba bha, utei u samla u la jubab ba u don ïa ka mynsiem ban kylla hynrei na ka liang ka seng ka la ong ba u dei ban leit phai shwa sha ïing bad ban wan mih sha ka ophis treikam ka seng namar ka don ka lad ka lynti ban sumar ïa u bad ba un kylla.
