Shillong, Jylliew 12
Ka Sorkar Jylla ka la pynkhreh ban shna kham pynheh ïa ka projek pynmih bording ha Riangdo, West Khasi Hills district ha kaba yn kham pynkiew ïa ka jinglah ban pynmih bording na ka 3 mega watt sha ka 6 mega watt.
Ka Riangdo Small Hydro Power Project ha West Khasi Hills district ka dei ka projek bording kaba nyngkong tam eh bad ynda la dep ban tei kan long ka jingmyntoi ïa ka thaiñ bad kan nang kham kyntiew ïa ka jinglah ban pynmih bording ilektrik.
La ong ba kane ka projek ka don ha Suanggre Hamegam hapoh Shallang, West Khasi Hills District.
Ha ka jingshisha, la dep buh mawnongrim da u Myntri Rangbah u Conrad K Sangma ban tei ïa kane ka projek tang kumba 3 MW kaba don ar Unit mar 1.5 MW kawei ka Unit.
La ïathuh ba ka jingmang pisa nyngkong ka long T.30 klur bad ynda la kham pynheh, yn dang donkam pisa shuh sa shiteng na kane kaba lang.
Kane ka projek kan pynmyntoi shisha ïa ki paidbah ha ka thaiñ West Khasi Hills district khamtam namar ka jingduna bording bad ju mad ïa ki jingpynlip ding ilektrik.
