Tura, Jylliew:
Haba ïadei bad ka jingnang mih ki jingpyrshah halor ka jingtyrwa ban khmih bniah ïa ka bhah thung kam ka Jylla, ka Tura Garo Senior Citizens Forum (TGSCF) ka pynpaw ïa ka jingpyrshah kaba jur halor kane, lyngba ka shithi kaba la aiti sha u Secretary ka Expert Committee, Bah L.K. Diengdoh.
“Ka TGSCF kum ka kynhun ka la mih shakhmat bad kane ka jingkyrpad halor ka nongrim jong ka jingsahdien ha ka liang ki mynbarim, imlang-sahlang bad ka ïoh ka kot jong ki Garo. Ka bhah kaba mar 40% ïa ki Khasi/Jaiñtia bad Garos ka dei kaba la rai da ka jingmynjur hapdeng ki nongïalam kiba la ïakhun ïa ka jingïakhih ban ïoh Jylla lajong bad ban pynneh ïa ka jingïatylli bad ka jinglong hok hapdeng ki ar kynhun jaidbynriew heh paid ka Meghalaya,” la ong ka kynhun ha ka shithi. Haba kdew ba ïa ka bhah thung kam ka Jylla la thaw da ki nongïalam nongseng bad ba ïohi jngai kiba la pynwandur ïa ka mat treikam da ka jingsngewthuh ïa ka imlang-sahlang, lariti bad ka ïoh ka kot jong ka Jylla da ka jingthmu ban kyntiew ïa kiba duna ha ka imlang-sahlang hapoh ka Jylla, ka kynhun ka la pynpaw ka jingpyrshah ban wanrah jingkylla ha ka bhah thung kam ba mynta.
