Shillong, Jylliew 12
U MLA ka VPP na North Shillong, Bah Adelbert Nongrum ha ka Sngi Balang u la leit ban ujor sha ka Meghalaya Lokayukta halor ki jingbym biang haba ïadei bad ka jingpyntreikam ïa ka skhim Saubhagya – kaba la paw ha ka kaiphod jong u Comptroller and Auditor General of India (CAG).
Ïa kane ka jingujor kaba la phah sha u Chair-person ka Meghalaya Lokayukta, Bah Bhalang Dhar la aiti sha u Secre-tary, Bah R. Rapthap.
“Kane ka jingujor ka long halor ka Section 13 (1) (a) jong ka Prevention of Corruption Act, 1988. Kane ka dei halor ka jinglap jong ka CAG, kaba dei ka kaiphod ka ba 2 jong u snem 2023 ha u kut snem jong u Lber, 2023,” la ong u Bah Nongrum haba kren sha ki lad pathai khubor.
U la ong ruh ba ïa kane ka kaiphod la phah sha ka Sorkar ha ka 06/09/2023 bad ha ka 22/09/2023, la wanrah ruh ïa kane hapoh ïingdorbar thawaiñ.
“Ha kane ka Dorbar Mang Tyngka ba la dep, nga la pyrshang wanrah ïa kane ban ïatai namar kane ka ktah ïa ka pisa u paidbah haba ïadei bad ka skhim Saubhagya hynrei u Lamphang um shym la ai lad ban ïaid shakhmat bad kane ka bynta,” u la ong.
Haba kynnoh ba ka don ka jingbamsap haba ïadei bad ka jingpyntreikam ïa kane ka skhim, u la ong ba kane ka la ïalam sha ka jingpynlut ka bym dei ban lut ne kaba lah ban kiar, sha kumba ?156 klur.
Ha ka jingujor, u MLA u la kdew ïa ka kyrteng jong ki ophisar kiba la kynnoh donkti ha ka kam bamsap ba kynthup ïa u Chief Secretary ka Sorkar Jylla, Additional Chief Secretary ba khmih ïa ka tnad bording bad Chairman-cum-Managing Director ka Meghalaya Energy Corporation Limited (MeECL).
Kiwei-kiwei ki ophisar barim ka Meghalaya Power Distribution Corporation Limited (MePDCL) kiba la kdew da utei u nongmihkhmat ki kynthup ïa u Director (Distribution), Chief Engineer (Distribution), Chief Engineer (Rural Electrification), Company Secretary, Chief Accounts Officer/Deputy Chief Accounts Officer, Additional Chief Engineer (Material Management) bad Additional Chief Engineer (Planning & Design).
“Kine ki dei ki 10 ngut kiba nga la ujor pyrshah, bad kane ka dei ha ka samoi treikam jong u snem 2018, kam dei ïa kane kaba mynta,” la ong u Bah Nongrum.
U la pynkynmaw ruh ba ka jingïalang u Secretary, ka Sorkar India lyngba ka ‘video conference’ ha ka 14.12.2018 bad u Chief Secretary ka Sorkar Jylla lem bad kiwei-kiwei ki ophisar ka MePDCL, la kren shai ba ym dei ban ïaid shakhmat bad ka jingkhot ‘Tender’ haba ïadei bad ka kam pynïasoh bording ha ki jaka nongkyndong lyngba ka skhim Saubhagya namar ba ka jinglut ka la heh bad kumta dei ban leh lyngba ka tnad treikam.
“Na ka liang u Chief Secretary, ka MePDCL ki la mynjur ha katei ka ‘video conference’ bad la dep ai ki jingkular hynrei wat hapdeng ki jingkular, la pynkheiñ bad ki la ïaid shakhmat bad ka jingkhot ‘Tender’ bad la ai ïa ka kam sha ki kontraktor (Turnkey Contractor) – Onycon Enterprises bad ka Satnam,” u la ong.
Shuh shuh utei u nongmihkmat ka VPP u la bynrap, “Nga kwah pynpaw ba ki paidbah kin tip – katno ngin pynksan ba kam don ka bamsap, kynmaw ba ki don 2 tylli ki jingïakhun kiba hakhmat eh ïa ka Jylla ha kane ka por – kumno ban rat dyngkhong ïa ka bamsap bad kumno ban rat dyngkhong ïa ka jingkynrei ha ki kam dih drok.”
Na ka liang jong u, u kyrmen skhem ka Lokayukta kan ai ïa ka jingbishar kaba hok na bynta ka jingmyntoi ka Jylla hi baroh kawei.
