Shillong, Jylliew 12
Ka khubor na ki pulit ba la ïohlum ha ka Sngi Balang ka ïathuh ba uwei u nongshong shnong ka Sohïong, East Khasi Hills, u la ujor ba ha ka 10 tarik Jylliew, ki briew ki bym lah ban ithuh, hynrei kiba la kam ïalade ba ki dei ki dkhot ka Hynñiewtrep Youths’ Council (HYC), ki la leit sha ka jaka ba u la pyntrei bad ki la peit ïa ki kot ki sla jong ki nongbylla.
Ha kajuh ka por, utei u nongujor u la kynnoh ba kitei ki briew ki la byrngem ïa ki nongbylla bad ki la beh ruh ïa ki na ka jaka ba ki trei.
Ha kawei pat ka jingjia, u PK Roy, u la ujor ba ha ka step jong ka 7 tarik Jylliew, ki runar ki bym lah ban ithuh ki la leit rung sha ka shlem treikam jong ka Survey of India, Malki Point, bad ki la tuh ïa ki kor um bad ki sainar kiba shongdor kumba T. 30,000.
Shuh shuh ki pulit ki la ïathuh ba ha ka 10 tarik Jylliew ha ka por kumba 1:40 mynsngi, u Elahi Sheikh, u la pyntip sha ki pulit ka thanat Rajabala, West Garo Hills, ba ka la don ka jingïakynad ha ka ïing jong u Islam Haque Choudhary uba dei u nongïalam ka shnong Garodubi. Ha ka jingtohkit jong ki pulit, ka la paw ba ki nongshong shnong jong ka Garodubi ki la bat ïa arngut ki khynnah kiba dang 19 snem ka rta.
