Shillong, Jylliew 12
U nongïalam ka BJP ha Arunachal Pradesh, u Pema Khandu, un wanphai biang kum u Myntri Rangbah ka Arunachal Pradesh, hadien ba u la shah jied kum u nongïalam ki MLA ka BJP ha ka Sngi Balang, bad ka jingpynbam smai ïa u kan long ha ka Sngi Palei.
Dang shen, ka BJP ka la jop kput ha ka ilekshon MLA ha Arunachal Pradesh na ki 46 tylli ki konstitwensi. Ka Ïingdorbar Thawaiñ ha Arunachal Pradesh ka don 60 ngut ki dkhot. Kaba wan ba ar ka dei ka National People’s Party (NPP) kaba la ïoh 5 ngut ki MLA.
Ha ka jingshisha, u Khandu u la jop ïa ka ilekshon khlem da donkam ban ïakhun pyrshah ïano-ïano.
Hadien ba u la shah jied kum u nongïalam ki MLA ka BJP, u Khandu u la leit ïakynduh ïa u Lat, u Lt. Gen. K. T. Parnaik (Retd.), ha Raj Bhavan ban kam na ka bynta ban thaw ïa ka sorkar bathymmai.
Na ka liang u Lat u la khot ïa u Khandu ban thaw ïa ka sorkar bathymmai bad ka jingpynbam smai ïa u bad ïa kiwei pat ki Myntri kan long lashai ka sngi ha ka por 10 baje mynstep ha DK Convention Centre ha Itanagar.
Kan dei ka sien balai ba u Khandu un bam smai kum u Myntri Rangbah. Lashai ka sngi, ïa ka jingïalang pynbam smai yn sakhi da ki Myntri Sorkar Pdeng ba kynthup ïa u Amit Shah, Jagat P Nadda, Kiren Rijiju, kiwei pat ki nongïalam ka BJP, ki Myntri Rangbah ka Nagaland, Assam bad Tripura nalor kiwei pat.
