Nongstoiñ, Jylliew:
Ka jingkut jingmut bad ka jingdon ïa ka thong ban ïoh kheit ïa u soh ka jingjop wat hapdeng shibun ki diengpyngkiang ha ka jingïaid lynti ban pynïaid shaphrang ïa ka skul ka la wanrah ïa ka jingjop. Kumta ha ka Sngi Palei ka skul Khlur Barit Secondary School, Umlieh ha West Khasi Hills ka la ïoh ban plie pyrda ïa ka jingrakhe jong ka jingdap 25 snem ka skul naduh ba la seng ïa ka.
Katkum ka histori lyngkot jong ka jingïaid lynti kane ka skul, la ong ba ha kaba nyngkong ki don lai ngut ki rangbah kiba la shim ïa ka rai ban seng noh da ka English School ha kaba la ai kyrteng ha kata ka por ka Little Star. Hynrei hadien ba ka por ka la ïaid bad ha ka jinglong ba tang lai ngut ban seng ïa ka skul kum ki mawbyrsiew ka la wanrah ka jingeh ban kyrshan ïa ki nonghikai ha kaba kane ka la la ïaid haduh u snem 1999.
Shuh shuh la ong ba kine lai ngut ki rangbah namar ka jingeh, ki la sngew dei ban sangeh noh namar ka shem shitom ban siew ïa ki nonghikai bad ki la ïa kut ruh ban sangeh noh ïa ka skul. Hynrei ha u snem 2000 ka la don ka jingpynsngew na ki ‘riew rangbah ka thaiñ ban ong ïa u Babu G Ningstar Marthong, uwei napdeng kitei lai ngut ki rangbah ba un ïeng bad ban shim noh ma u marwei ïa ka skul, ha kaba kane ka la pynlong ïa u Babu Marthong ba un pyrkhat bunsien. Hadien kane u Babu Marthong u la shim ïa ka rai rangbah ban pyrshang la ka pyrshang bad kumta na ka jaka ba la seng nyngkong ïa katei ka skul, u la wanrah noh ha katei ka jaka kaba mynta bad la pynkylla noh ruh ïa ka kyrteng jong ka skul na ka ‘Little star’ sha ka ‘Khlur Barit’.
La ong ruh ba kane ka skul mynta ka don ïa ka jingangnud ba kan dang kyntiew kyrdan shuh sha ka Higher Secondary bad ka ba-ar pat ka long ba ka skul ka don ruh ïa ka jingthmu ban plie ruh ïa ka Football Academy.
Ha katei ka sngi plie ïa ka jingrakhe, u MLA/MDC ka Nongstoiñ u Bah Gabriel Wahlang u la ïadon lang kum u kongsan, u Bah MA Challam, ADC ka West Khasi Hills u la long kum u symbud kongsan ryngkat ka jingdonlang ki khynnah skul, ki nonghikai, ki kmie ki kpa, ki ‘riew rangbah, ki nongïalam niam bad kiwei kiwei.
Ha katei ka sngi nalor ki prokram bapher bapher ba la ïashim bynta da ki khynnah skul, la ïoh ruh ban pynkup burom ïa u Babu Marthong kum u nongseng bad kumjuh ruh ïa kiwei pat ki ‘riew rangbah kiba la ïadonlang ha katei ka sngi kynthup ïa ki kongsan.
U Bah Gabriel Wahlang haba kren kum u kongsan u la ai khublei kyrpang ïa u nongseng kiba wat hapdeng ki jingeh kiba bun hynrei u la ïaid shakhmat ryngkat ki nongai mynsiem bad kane ka pynlong ba na ki hynriew ngut ki khynnah skul ban kiew sha laispah arphew hynriew ngut bad kane ka dei ka jingai mynsiem ïa baroh.
U la pynpaw ruh ba kum u MLA un ïai don ryngkat bad kane ka skul la ka long ha ki skhim lane kino kino ki jingdonkam bad ka bit ka biang ïa ka skul. U la ong ba ka jingnang jingstad ka dei kaba kyntiew bad pynmih ïa ka jaidbynriew, ka jingnang ka jingstad ka pyllait ban ngeit ha lade bad ban tip bad bishar shuwa ban trei ïa kano-kano ka kam bad shuwa ban kyntiew ïalade ha kano kano ha ka jingim.
